Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 29 agostu 2019 (TATOLI) — Prezidente Parlamentu Nasionál (PPN), Arão Noé de Jesus da Costa Amaral, agradese kontribuisaun hosi Organizasaun Nasaun Unida (ONU), Estadu Unidu Amérika (EUA) no Portugal, hosi prosesu luta Timor-Leste, Konsulta Populár (Referendum) to’o independénsia.

Nia dehan, Portugal fó apoia ba Timor-Leste hahú hosi 1975 hodi konvense nasaun sira seluk iha rai-li’ur.

“Primeiru ita agradese ba kontribuisaun tomak hanesan Estadu Unidu Amérika no Organizasaun Nasaun Unida, bazeia ba akordu 5 de maiu hodi realiza referendu ne’e. Nune’e mós agradese ba Portugal hanesan país administrator dezde 1975 ajuda luta povu Timor-Leste nian iha li’ur hodi konvense nasaun sira seluk hodi fó apoiu, nune’e mós agradese mós ba Indonézia”, dehan PPN ba Agénsia TATOLI, iha Parlamentu Nasionál (PN), kinta ne’e.

Ho kontribuisaun hirak ne’e mak hakotu povu nia terus durante tinan 24 nia laran, hahú hosi 1975 to’o 1999.

“Ita mós agradese Austrália ne’ebé konstitui INTERFET hodi tama mai hodi normaliza fali situasaun iha kriasaun primeiru Governu. Agradese mós ba povu Timor-Leste tomak, tanba sira-nia esforsu, dedikasaun durante luta naruk ida iha 1999, sira hakat ho fiar-aan ba iha sentru votasaun para atu vota”, nia akresenta.

Nune’e mós Arão Noé fó parabéns ba ema hotu, ne’ebé hatudu dedikasaun liuhosi votasaun iha 30 agostu 1999.

“Objetivu prinsipál aban iha Parlamentu Nasionál atu halo reflesaun, reflete ba pasajen hahú hosi 1975 to’o 1999. Ema rihun ba rihun mate, kombatente barak soe isin no raan iha foho leten hodi defende ukun-aan, agora ita ukun-aan ona, ho komemorasaun ne’e reflete ba kotuk hodi projeta ba oin”, nia subliña.

Nia hatutan, kabe ba timoroan ne’ebé sei moris para reflete funu na’in sira-nia luta ne’e hodi konstrui estadu.

PPN informa, oras ne’e preparasaun atu simu bainaka espesiál iha PN másimu ona. Bainaka espesiál ne’ebé sei partisipa iha sesaun solene  iha ámbitu komemorasaun 20 aniversáriu referendu no misaun INTERFET nian.

Bainaka ne’ebé partisipa iha sesaun solene ne’e mak hanesan Reprezentante Sekretáriu Jerál ONU, Ian Martin, Prezidente Asembleia Repúblika Portugueza, Eduardo Ferro Rodriguês.

Sekretáriu Jerál ONU sei halo leitura mensajen komemoarasaun ho tema ‘’Das Cinzas á Reconciliação e Desenvolvimento Nacional’’.

Jornalista: Evaristo Soares Martins

Editór: Xisto Freitas

 

HAKEREK NO HATÁN

Please enter your comment!
Please enter your name here