Ministru Defeza Portugál, João Gomes Gravinho, akompaña husi Ministru Defeza no Ministru Interior internu, Filemode de Jesus da Paixão. Imajen Eugénio Pereira

DILI, 29 agostu 2019 (TATOLI) – Ministru Defeza Portugál,  João Gomes Gravinho, deklara sei kontinua hametin kooperasaun bilaterál ho Governu Timor-Leste atu dezenvolve setór defeza, liliu iha área militár.

“Ha’u sei hasoru malu ho ha’u nia omólogu, Jenerál Filomeno Paixão, ami sei ko’alia kona-ba asuntu defeza nian no kooperasaun ba militár entre Portugál no Timor-Leste hanesan kompromisu ne’ebé iha tempu naruk no oinsá haree atu hametin liután kooperasaun hirak ne’e”, dehan Ministru, João Gomes Gravinho ba jornalista sira durante estádia iha eeroportu Internasionál Prezidente Nicolau Lobato, ohin.

Nia dehan Portugál disponível atu kontinua apoiu Governu iha parte (..) marítima tuir nesesidade Timor-Leste.

Ministru Defeza Portugál ne’e mós transmite mensajen kongratulasaun hosi Primeiru Minsitru Portugál, António Costa, ba povu no Estadu Timor-Leste.

“Primeiru Ministru (Portugál, António Costa) hato’o mensajen alegria no fraternidade, Timor-Leste momentu di’ak atu hanoin hikas fila no la’o hamutuk ba futuru”, nia hatete.

Reprezentante Primeiru Ministru Portugál ba iha seremonia komemorasaun tinan  20 loron konsulta populár ho ekipa to’o iha eeroportu simu  diretamente hosi Ministru Defeza, Filomeno Paixão  ho   ekipa dansa kulturál no tasa taís hosi Grupu Timor Furak.

Iha fatin hanesan Ministru Defeza no Ministru Interior Internu, Filomeno  de Jesus da Paixão, agradese ba kompromisu Portugál nian hodi kontinua apoiu iha setór defeza no seguransa.

Alende, Portugál, Governu Austrália mós iha nafatin kompromisu ho Forsa Defeza Nova Zelándia hodi ajuda Timor-Leste.

“Ita agradese alende Portugál, Australia mós kontinua ajuda ita iha setór defeza no autoridade marítima, tanba Australia mós fó ona ró patrullamentu boot rua iha 2023 no ho Nova Zelándia fós mós treinu rekursu umanu ba ita nia militár sira”, dehan Governante.

Nia dehan tan hosi Portugál sei apoiu hodi kria autoridade marítima ne’ebé sei envolve liña ministériu hodi seguransa ba tasi kosta súl.

“Kriasaun autoridade maritima ne’e importante para bele halo servisu too área Kosta Súl”, Paixão hatutan.

Tuir planu iha fulan-Setembru 2019, Ministru Defeza sei aprezenta proposta kriasaun autoridade marítima ba Konsellu Ministru hodi diskute no aprova.

Jornalista: Eugénio Pereira

Editora: Rita Almeida

HAKEREK NO HATÁN

Please enter your comment!
Please enter your name here