Primeiru-Ministru Vanuatu, Hon. Charlot Salwai Hasoru Malu Xefi Negosiador Fronteira Maritima no Terestre, Xanana Gusmao, iha Palásiu Governu, Dili, Kinta (29/08/2019). Imajen/TATOLI.

DILI, 29 agostu 2019 (TATOLI) – Ohin, Xefe Negosiadór Prinsipál Delimitasaun Fronteira Marítima, Kay Rala Xanana Gusmão halo reuniaun kortezia ho Primeiru-Ministru (PM) Vanuatu, Carlot Salwai, iha Palásiu Governu.

Reprezentante Xefe Negosiadór, Roberto Soares hateten, Vanuatu hanesan mós nasaun ida ne’ebé apoiu Timór iha tinan barak ba prosesu luta ukun rasik aan nian.

“Ohin sira mai dala ida tan hodi agradese no haree Timór nia referendu depois de 20 anos, sira sente orgullu tanba kontribuisaun uitoan ne’ebé sira halo konsege halo povu Timór sente ukun rasik aan, moris nu’udar nasaun livre no independente,” haktuir Reprezentante Xefe Negosiadór, Roberto Soares ba jornalista sira.

Nia haktuir, iha vizita ne’e ko’alia mós kona-ba kooperasaun entre rai nasaun rua iha ukun aan ida ne’e. “Depende ba elaborasaun ba ezekutivu na’in rua para reforsa liután ita-nia amizade”.

Eis-Vise Ministru Negósiu Estranjeiru no Kooperasaun ne’e haktuir, Vanuatu agradese Xanana ba disponibilidade tomak hodi bele simu sira. Sira rekoñese Xanana hanesan lideransa másimu ba iha prosesu luta ukun rasik aan. Nune’e mós agradese disponibilidade “Maun-boot” nia hodi simu Sira.

“Sira rekoñese ita-nia Maun-boot nu’udar lideransa másimu ba ita-nia prosesu ukun rasik aan. Nune’e mós revela ba mundu kona-ba prosesu luta foun ita nian liuliu iha ámbitu asegura soberania nasionál ba tasi nia. Ho mekanizmu ida ne’e tanba Timór nia matenek liuhusi Kay Rala Xanana Gusmão, primeira vez, ita inísia prosesu foun ida iha kontextu Nasaun hanaran UNCLOS (United Nations Convention on the Law of Sea). Tanba ne’e, sira mai atu aprende nune’e bele aplika mós asaun balun ne’ebé relevante ba sira-nia situasaun,” nia haktuir.

Iha biban hanesan, Xanana mós agradese ba sira no husu sira atu esplora hodi haree progresu saida maka hala’o ho ida ne’e no kontinua husu apoiu hanesan amigu atu kontinua sai lian ba Timór iha rai li’ur.

 Jornalista: Nelia Borges

Editór      : Rafy Belo

HAKEREK NO HATÁN

Please enter your comment!
Please enter your name here