Prezidente Repúblika, Francisco Guterre Lú Olo, akompaña husi espoza, Cidália Nobre hamutuk ho Prezidente Asembleia Repúblika Portugal, Eduardo Ferro Rodrigues, ne’ebé akompaña mós husi espoza, Maria Filomena Lopes Peixoto de Aguia, iha jantar kalan iha Palásiu Prezidensiál, kinta (29/8). Imajen/Mídia PR

DILI, 29 agostu 2019 (TATOLI) – Prezidente Repúblika (PR), Francisco Guterres Lú Olo, ofisialmente hato’o bem vindu ba bainaka husi rai liur, ne’ebé marka prezensa iha komemorasaun tinan 20 Konsulta Populár no Misaun INTERFET iha Timor-Leste.

Xefe Estadu konvida bainaka sira hodi han kalan hamutuk, ne’ebé oferese husi Gabinete Palásiu Prezidente, iha Palásiu Prezidensiál.

“Hau hakarak sauda ho fraternidade, no hato’o bem vindu ba reprezentante hotu ne’ebé mai husi parte oioin, ho ita bo’ot sira nia prezensa, ita hotu sente dala ida tan sentidu solidariedade ba povu ida nee,  povu Timor Leste”, tenik PR Lú Olo.

Xefe Estadu dehan tan, iha kalan memória ne’e, ita hotu halibur hamutuk atu selebra tinan 20 referendu ba auto-determinasaun povu Timor-Leste.

“Ita hotu belun, no iha amigu di’ak ida atu selebra hamutuk buat ne’ebé ita konkista hamutuk”, nia akresenta.

PR hatutan: “Ita bot sira nia sentidu solidariedade, sentidu justisa, no korajen, hanesan ita nia determinasaun ne’ebé konkista hamutuk, ita nia firmeza ne’ebé ohin loron hatudu duni katak vitória ne’e ita hotu nian”.

Alende ne’e, xefe estadu fó hanoin katak, serimónia ne’e hodi ita halibur hamutuk no hamoris fali momentu ne’ebé nakonu ho triste no alegria.

Iha konvíviu ne’e, bainaka sira nakonu ho ambiente amizade, no espresa sentidu solidariedade liliu ba komemorasaun loron importante ne’e.

Partisipa iha han kalan hamutuk hanesan, Prezidente Asembleia Repúblika Portugueza, Prezidente Asembleia Jerál Cabo Verde, Primeiru-Ministru Austrália, Vanuatu, Repúblika Sentru Africana, eis titulár no orgaun soberania sira, Prezidente Parlamentu Nasional, Deputadu sira, membru governu sira, Prezidente Tribunal Rekursu, Reprezentante Sekretáriu Jerál Nasaun Unida (ONU), Korpu Diplomátiku, no amigu husi rai liur sira.

Jornalista: Cipriano Colo

Editór: Xisto Freitas

 

HAKEREK NO HATÁN

Please enter your comment!
Please enter your name here