Veteranu Mário de Sousa Guterres 'Nunura'. Imajen Tatoli/Hortençio Sanchez

DILI, 29 agostu 2019 (TATOLI)—Veteranu Mário de Sousa Guterres ‘Nunura’, konsidera katak maski Timor-Leste uku-aan tinan 20 ona maibé Governu seidauk kria kondisaun di’ak ba veteranu sira.

“Dezenvolvimentu hotu la’o di’ak, maibé dezenvolvimentu ida iha parte umanu Governu seidauk tau-matan di’ak. Ha’u ne’ebé ko’alia dadauk nehan monu no fuuk mós mutin ona. Se Governu la fó atensaun di’ak kuandu ha’u mate, ha’u-nia oan Governu la koñese,” dehan Nunura ba agência Tatoli iha Praia dos Coqueiros, Dili, ohin.

Nia haktuir, bainhira loron boot ruma foin Governu koñese sira (veteranu), maibé loron boot liu la koñese ona.

“Loron importante sira hanesan ne’e, ema boot ida hakat mai komprimenta ami dehan veteranu, maibé loron boot ne’e liu, ami la’o iha dalan sira haree la koñese ona ami. Biar ami hasee mós sira la’o liu de’it. Ida ne’e ha’u la inventa. Realidade mak nune’e duni,” Nunuro informa.

Veteranu ne’e haktuir tan: “Ha’u hanesan komandante ida mós, ha’u nia ain ne’e bala musan iha laran hela. Ha’u ko’alia ho Governu atu halo operasaun de’it mós laiha resposta. Ha’u-nia soldadu sira balu moras mai ospitál laiha ema ida mak tau-matan ho di’ak. Só ami mai hakilar ho lian maka’as sira serbisu iha ospitál foin hakfodak maibé balun ne’e labele salva sira-nia vida. Governu tenke haree buat hirak ne’e,” nia subliña.

Nia haktuir, veteranu barak iha área rurál kondisaun uma seidauk sufisiente no pensaun ne’ebé Governu oferese la to’o hodi sustenta sira-nia nesesidade hodi haruka oan ba eskola.

“Ha’u husu ba Governu, se bele, veteranu sira husik goza lai eletrisidade ne’e ba keta selu lai, goza netik bee ne’e labele selu lai. Bele karik halo mós uma oan ida ba sira nune’e bele hela iha fatin mahon hafoin sira mate. Husik sira goza netik ukun-aan ne’e ho di’ak. Ha’u ko’alia ho to’os karik ema ne’ebé uluk lakohi ukun-aan ohin loron ho previléjiu goza ba mai, maibé ami la rai ódiu ida. Se bele tau matan netik mai ami,” veteranu ne’e sujere.

Nia haktuir, naran ida Nunura uluk iha tempu rezisténsia koñesidu tebes maibé to’o ohin loron la vale tiha de’it.

“Ha’u ida ko’alia dadauk ne’e uluk iha ai-laran komandante Xanana Gusmão no Taur Matan Ruak sempre uza ha’u. Presiza ha’u la’o hamutuk ho sira to’o Indonezia sira mós hatene naran ida Nunura maibé ohin ita ukun-aan tiha Nunura ne’e la vale liu,” nia haklaken.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here