Deputadu Bankada CNRT, Dionísio Babo Soares. Foto António Gonçalves.

DILI, 29 agostu (2019)-Ministru Negósiu Estranjeiru no Kooperasaun (MNEK), Dionísio da Costa Babo Soares realiza enkontru kortezia ho embaixadór estranjeiru sira, iha ámbitu hodi ko’alia kona-ba serbisu hamutuk entre Timor-Leste ho nasaun seluk.

“Primeiru simu, embaixadór husi nasaun viziñu Indonézia dadeer ne’e ami hare diskute kona-ba situasaun ikus liu, sira mós serbisu hamutuk ho ita para haree katak, ita-nia atividade sira ne’e la’o ho di’ak. Ha’u hateten ba nia katak buat hotu di’ak tebetebes,” hateten Ministru Dionísio Babo Soares ba jornalista sira iha Praia dos Coqueiros, Dili, kinta ne’e.

Ministru Dionísio Babo fó obrigadu ba Indonézia, liuliu relasiona seguransa iha fronteira entre Timor-Leste no Indonézia. “Sira ajuda ita fó atensaun mós ba ita, ita mós iha buat ruma bele komunika diretamente ho sira, depois sira responde, ajuda ita para buat hotu la’o di’ak, dehan governante.

Diplomata timoroan ne’e informa tan katak depois sorumutu ho embaixadór Sahat Sitorus, tuir mai hasoru malu mós ho embaixadora husi Repúblika Uniaun Myanmar nian iha Jakarta no mai Timor-Leste, Khin Aye to Pay.

“Ami ko’alia buat tolu, primeiru kona-ba orsida sira-nia ministru ne’ebé sai enviadu espesiál husi Konselleiru estadu mai atu tuir ita-nia 31 agostu, segundu sobre preparasaun ba ita halo izensaun vistu ba pasaporte diplomátiku ou pasaporte  serbisu, ne’e para iha komunikasaun di’ak, prepara ba komunikasaun ida aberta entre nasaun rua ne’e. Terseiru kona-ba preparasaun ba nota entendimentu sobre kooperasaun téknika entre Timor-Leste ho Myanmar,” tenik diplomata timoroan ne’e.

Iha biban hanesan, Ministru Dionísio Babo hateten, liuhusi enkontru ne’e, bele haree, esplora, posibilidade iha área edukasaun tanba, tuir ministru katak universidade iha Myanmar koñesidu tebes, até liurai Tailándia nian mós ba eskola iha ne’ebá.

“Haruka mós oan sira ba eskola iha ne’ebá, nune’e mós área seluk bele koopera hamutuk liuliu iha área agrikola nian no mós setór sira seluk”.

MNEK, alende enkontru kortezia ho embaixadór Sahat Sitorus no Embaixadora Khin Aye to Pay, hasoru malu ho Ministru Estadu Singapura, Mohamad Maliki Osman inklui mós MNEK Laos nian, Saleumxay Kimmasith no sira seluk tan.

 Jornalista : Nelia Fernandes

Editór       : Rafy Belo 

HAKEREK NO HATÁN

Please enter your comment!
Please enter your name here