Ministru Agrikultura no Peska, Joaquim José Gusmão dos Reis Martins, kuarta, (19/2/2019). Imajen Egas Cristovão.

DILI, 29 agostu 2019 (TATOLI)-Ministru Agrikultura no Peska, Joaquim José Gusmão dos Reis Martins, hatete atu redús importasaun maka Ministériu Agrikultura no Peska (MAP) tuir polítika Governu Konstitusionál Daualuk nian, iha tinan 2020, konsentra ba irrigasaun sira hodi hasa’e produsaun to’o porsentu 70 no porsentu 30 mak ba importasaun.

“Ami konsentra nafatin ba hasa’e produsaun, tanba ne’e maka iha ha’u-nia mandatu konsentra ba iha irrigasaun sira ne’ebé mak boot para hodi loke tan agrikultura nian. Nune’e husi diresaun jerál agrikultura mós iha ona planu tinan-tinan atu loke tan natar hira nune’e bele atinje porsentu 70 produsaun iha rai-laran, esforsu tomak ami halo”, Ministru Joaquim afirma ba Tatoli, ohin, iha Pura Giri Natha Taibesi, hafoin partisipa reza hamutuk ho komunidade Indú iha Timor-Leste hodi komemora aniversáriu ba dala-20 Konsulta Populár no Misaun INTERFET.

Governante ne’e salienta, Governu sei la estabelese tan irrigasaun, maibé sei reabilita de’it irrigasaun ezistente sira.

“Sei la halo tan irrigasaun foun no konsentra lai ba sira ne’ebé maka iha tanba irrigasaun boot sira iha seidauk maximiza. Tanba ne’e maka maximiza uluk lai eskema irrigasaun ne’ebé mak iha hanesan Tono, Bulutu, Oebaba, Maliana 1, Maliana 2, no Karau Ulun, konsentra lai ba sira no haree lai ninia rezultadu”, Joaquim esklarese.

Tanba ne’e Governu liuhusi MAP planeia ona hodi prevee osan hodi reabilita irrigasaun sira ne’ebé sai prioridade nune’e bele hasa’e produsaun rai-laran, tanba durante tinan rua (2017-2018) nunka halo reabilitasaun, tanba de’it Estadu moris de’it ho orsamentu doudésimu.

Notísia relevante : TL Importa Foos Tonelada Rihun 80 Kada Tinan Tanba Produsaun Sei Mínimu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here