Diretór Étika no Disiplina Liga Futeból Amadora (LFA), Octaviano da Conceição. Imajen Tatoli/Hortençio Sanchez

DILI, 29 agostu 2019 (TATOLI)—Diretór Étika no Disiplina Liga Futeból Amadora (LFA), Octaviano da Conceição, hateten LFA sei foti desizaun todan hasoru ekipa Atlético Ultramar.

Desizaun ne’ebé Diresaun Étika no Disiplina foti hasoru klube refere bazeia ba jogu Tasa 12 Novembru ne’ebé hala’o iha Estádiu Munisipál Dili, tersa (27/08), jogadór Ultramar abandona kampu bainhira hasoru Lalenok United FC, tanba árbitru foti desizaun la loos hasoru jogadór Lalenok ne’ebé halo erru hasoru jogadór Ultramar.

“Ami sei foti desizaun hasoru ekipa Ultramar. Desizaun atu foti ne’e sei la sees hosi regulamentu ka kódigu étika Federation International Football Assosiation, Asian Football Confederation, Federasaun Futeból Timor-Leste no Liga Futeból Amadora adopta,” dehan Octaviano liuhosi konferénsia imprensa ne’ebé hala’o iha salaun Xanana Sport Center, Bairro Formosa, Dili, ohin.

Nia dehan, regulamentu futeból todan tebes, tanba ne’e, desizaun ne’ebé foti bele halo ema barak kontente no barak la kontente. Ida ne’e mak desizaun ne’ebé nakonu ho responsabilidade.

“Ha’u atu ko’alia fó hanoin fali, iha époka dala rua liu-ba, Liga Amadora liuhosi ha’u-nia kna’ar duni foti desizaun ida todan tebes hasoru klube segunda divizaun ADR União tanba abandona kampu hanesan kazu Ultramar nian. ADR União la partisipa jogu liga durante époka rua tutuir malu,” Octaviano haktuir.

Entretantu, aleinde sei foti desizaun todan ba Ultramar, sei haraik mós sansaun todan hasoru jogadór hirak ne’ebé abandona kampu.

Relasiona ho asuntu ne’e, Tatoli tenta kontaktu ho Prezidente Klube Ultramar, Ano Gusmão maibé okupadu hela ho serbisu seluk.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here