BOBONARO, 29 agostu 2019 (TATOLI) – Governu liu husi Ministériu Reforma Lejizlativa Asuntu no Parlamenteres (MRLAP), kontinua hala’o konsultasaun públiku lei kostumeiru no justisa tradisionál iha ámbitu komemorasaun aniversáriu loron konsulta populár ba dala-20 (30 agostu 1999-30 agostu 2019) no prezensa misaun INTERFET, 20 setembru 1999.
Notísia Relevante : MRLAP Halo Konsultasaun Lei Kostumeiru ho Étniku Kemak
Rosito da Silva Belo nu’udar asesór Reforma Lejizlativa ba Asuntu Sosiedade Sivíl informa ekipa MRLAP-GRL (Gabinete Reforma Lejizlativa) hala’o konsulta públiku lei kostumeiru ho komunidade husi suku tolu ne’ebé ko’alia lian Kemak.
“Ha’u hanoin katak ho programa ida nee, aproveita oportunidade hamutuk ho komunidade hodi festeja loron boot konsulta populár iha baze,” tenik Rosito da Silva Belo, ba Ajénsia TATOLI, iha Sede Suku Atu Aben, Bobonaro, Kuarta (28/08/2019).
Nia esplika, objetivu husi atividade ida nee bele elabora idea sira husi katuas lian na’in sira, lider juventude, xefe suku sira, inklui autoridade postu administrativu sira iha Postu Bobonaro kona ba uzu kostume ne’ebé durante nee, komunidade sira uza hodi halo arbitrajen, rekonsiliasaun no mediasaun ba kazu sivíl sira.
Nia mós esplika liu tan katak iha Konstituisaun RDTL artigu 4.2 rekoñese uzu kostume inklui valór kulturál sira naran katak la kontra valór sira iha Konstituisaun no konvensaun internasionál sira ne’ebé Timor-Leste ratifika ona.
Jornalista : Domingos Piedade Freitas
Editór : Francisco Simões
