Jornalista timoroan na’in neen ne’ebé eskollidu sai bolseiru dahuluk ba Embaixada Estadu Unidu Amérika (EUA) nia programa bolsa-estudu Marie Colvin Memorial English Journalism. Foto: EUA

DILI, 29 agostu 2019 (TATOLI)-Jornalista timoroan na’in neen hanesan Constâncio dos Santos Vieira, Gaudêncio Marquês Figueredo, Imaculada Natividade da Costa Ximenes, Olga Soares, Vanesa Cunha Alves no Zezito da Silva eskollidu sai bolseiru dahuluk ba Embaixada Estadu Unidu Amérika (EUA) nia programa bolsa-estudu Marie Colvin Memorial English Journalism-jornalista amerikana ida ne’ebé ajuda timoroan sira iha prosesu ukun rasik aan.

“Figura Marie Colvin, iha momentu ne’ebá hamutuk ho timoroan besik 1.500 mantein iha sede UNAMET nian hodi fó korajen ba timoroan sira atu vota no mós luta ba independénsia Timór nian,” hateten Embaixadora Amérika iha Timor-Leste, Kathleen Fitzpatrick ba jornalista sira iha Embaixada Amérika iha Timor-Leste, ohin.

Iha fatin hanesan, Bolseiru Zezito da Silva, jornalista Ajénsia TATOLI, agradese oportunidade ne’ebé mak oferese husi EUA ba jornalista timoroan sira, iha ámbitu bolsa-estudu, Marie Colvin Memorial English Journalism, ne’e.

“Oportunidade ida ne’e, sira husi embaixada Amérika hola inisiativa, para ami jornalista bele hetan oinsá atu hatutan nafatin ninia espíritu jornalista, atu bele luta nafatin hodi kontribui ba estadu direitu demokrátiku, liuliu ba kontribuisaun oinsá atu kontribui ba demokrasia ida ne’ebé mak justu iha ita-nia nasaun,” tenik jornalista ne’e.

Entretantu, lansamentu bolsa estudu ba jornalista timoroan sira ne’e partisipa husi Sekretáriu Estadu Komunikasaun Sosiál, Merício Juvinal dos Reis Akara, Asistente Sekretáriu Estadu EUA nian ba Asuntu Ázia Leste no Pasífiku David R. Stilwell.

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here