Ministra Edukasaun, Juventude no Desportu Dulce de Jesus Soares .Imajen/TATOLI

DILI, 28 agostu 2019 (TATOLI) – Ministra Edukasaun Juventude no Desportu (MEJD), Dulce de Jesus Soares apresia serbisu maka’as ne’ebé komunidade husi igreja Protestante hatudu ona iha rai Timor-Leste hodi kolabora hamutuk realiza eventu tinan 20 Konsulta Populár.

Loron 30 Agostu nu’udar loron importante tebes ba Timor-Leste no ba povu timoroan sira, la haree ba kór tanba ema hotu hanesan de’it iha nasaun ne’e.

“Ita hatene katak asaun ida ne’e (misa hamutuk) governu foti hodi komemora tinan 20 Konsulta Populár atu hametin unidade, amizade, liu husi Na’i Maromak nia grasa ba ita timoroan hotu,” hateten Ministra Dulce de Jesus iha nia mensajen perante sarani Protestante sira, iha ámbitu komemorasaun tinan 20 Konsulta Populár, iha Igreja Hosana, Vila Verde, kinta (28/08/2019).

Governante ne’e hatutan, timoroan hotu husi ne’ebé de’it tenke tane no valoriza nafatin ukun rasik aan ida ne’e atu Timor-Leste bele sai nasaun ida forte iha dame nia laran.

Nune’e mós, iha biban hanesan, nia agradese  tanba konsidera mezmu Timor-Leste, oras ne’e, kontinua hela ho ninia prosesu rekonstrusaun estadu maibé diferente ho nasaun seluk iha mundu, ne’ebé ohin loron moris iha terus no susar nia laran. “Ida ne’e hotu tanba grasa Maromak nian,” afirma Ministra Dulce de Jesus Soares.

Ministra Dulce de Jesus Soares agradese tanba bele hato’o ninia mensajen ba sarani Igreja Protestante sira mezmu ho tempu ne’ebé limitadu ho razaun sei partisipa hikas inaugurasaun edifísiu foun ida iha INFORDEPE (Instituto Nacional Para A Formação dos Docentes e Profissionais da Educação), ne’ebé hala’o diretamente husi Eis-lider Rezisténsia Kay Rala Xanana Gusmão ho Eis-Xefe UNAMET, Ian Martin.

Notísia relevante: Komunidade Xineza Hala’o Serimónia Sambaia Selebra Konsulta Populár

Governu Husu Komunidade Musulmanu Apoia Dezenvolvimentu Nasionál

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here