Ministru Obra Públika, Salvador Soares dos Reis Pires. Imajen/TATOLI

DILI, 29 agostu 2019 (TATOLI)-Oitavu Governu Konstitusionál liuhosi Ministériu Obra Públika (MOP) esforsu aan atu populasaun iha territoriu Timor-Leste bele asesu infraestrutura ho kuallidade, dignu no saúdavel.

“Ami kontinua loke aan ho esforsu para ita-nia populasaun iha territóriu Timor-Leste bele asesu infraestrutura ho di’ak”, Ministru Obra Públika, Salvador Eugénio Soares dos Reis Pires, afirma iha Meskita An-Nur, Kampung Alor, ohin.

Iha tinan 20 era ukun aan ne’e, nia dehan iha progresu barak iha setór infraestrutura liuliu estrada, ponte, bee-moos, saneamentu no eletrisidade tanba maioria populasaun bele asesu, maski balun seidauk.

“Ami hasoru dezafiu uitoan mak ami tama iha 2017-2018 kuaze orsamentu selu de’it ba dívida, maibé agora ami tenke prepara ona planu atu kompleta infraestrutura ne’ebé povu balun seidauk  asesu”, Salvador katak.

Oitavu Governu liuhosi MOP hahú halo revizaun no ezersísiu ba planu orsamentál ba proposta Orsamentu Jerál Estadu (OJE) 2020 ne’ebé foku ba área moris di’ak povu nian, kapitál sosiál no infraestrutura bázika bee, estrada no eletrisidade.

Atu mellora infrastrutura bázika, nia dehan tinan oin (2020) realiza projetu bee no saneamentu hamutuk 70  no projetu 53  ne’ebé iha prosesu aprovizionamentu. Enkuantu projetu ne’e hala’o fazeadamente tuir planu mestre atu  populasaun hotu-hotu bele asesu bee-moos.

Nia salienta, Governu fó prioridade ba konetividade estrada entre nasionál ba munisípiu no munisípiu ba área rurál hodi fasilita movimentasaun populasaun sira nian, tanba ne’e tinan-tinan Governu kontinua tau orsamentu millaun $20 hodi halo kontrusaun ba estrada rurál sira.

Kona-ba eletrisidade ne’e, Governu hahú periorizita ba suku 67 ne’ebé seidauk asesu no tinan oin hala’o projetu 23 ho fazeadamente to’o tinan 2025 populasaun Timor-Leste bele asesu hotu eletrisidade.

“Iha ami-nia orsamentu 2020 ho montante millaun $58  ne’ebé sei kontinua prioritiza ba infraesturura bázika hodi nune’e populasaun bele asesu ho kualidade, saudavel no forte”, katak nia.

Ministru Salavador mós afirma Governu hanoin ona atu halo bairru foun ba komunidade sira atubele hela ho dignu.

Polítika Oitavu Governu  baze ho Planu Objetivu Dezenvolvimentu Sustentavél (ODS) no Planu Estratéjiku Dezenvovlimentu Nasionál (PEDN) atu garante bem estar povu nian, liuliu investe iha kapitál sosiál  no infraesturutura bazika hanesan bee no saneamantu, estrada, ponte no eletirisidade.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here