Eis Pontu Fokál Sekretáriu Jerál Organizasaun Nasaun Unida (ONU), Tamrat Samuel no Eis Reprezentante Adjuntu Sekretáriu Jerál ONU, Francew Vendrell, iha kinta ne’e, hasoru malu ho Prezidente Republika, Francisco Guterres Lú Olo, iha Palásiu Prezidensiál, kinta (29/8). Imajen/Mídia-PR

DILI, 29 agostu 2019 (TATOLI) Eis Pontu Fokál Sekretáriu Jerál Organizasaun Nasaun Unida (ONU), Tamrat Samuel no Eis Reprezentante Adjuntu Sekretáriu Jerál ONU, Francew Vendrell, iha kinta ne’e, hasoru malu ho Prezidente Republika(PR), Francisco Guterres Lú Olo iha Palásiu Prezidensiál, hodi halo reflesaun ba istória pasádu.

Xefe Estadu konsidera, Francesc Vendrell no Tamrat Samuel nu’udar figura prinsipál iha luta diplomátika nian, liliu iha ONU ne’ebé ho determinasaun hamoris nafatin kestaun Timor-Leste nian to’o hetan independénsia.

PR haksolok ho figura prinsipál rua ne’e, hamutuk ho konvidadu Estadu Timor-Leste, hodi bele partisipa iha komemorasaun tinan 20 Konsulta Populár no Misaun INTERFET,  hamutuk ho entidade no povu Timor-Leste, tanba komemorasaun ne’e nu’udar festa ba vitória ema hotu ninian.

Xefe Estadu haktuir, bainhira sei iha ai-laran iha luta Libertasaun Pátria no rona figura rua nia deklarasaun sira iha rádiu rezisténsia iha Timor-Leste, senti la mesak hasoru okupasaun Indonézia.

Francesc Vendrell no Tamrat Samuel kompremetidu ba luta povu Timor-Leste la’ós de’it atu halo mundu internasionál rekoñese nia direitu ba auto-determinasaun, maibé mós implementa povu atu ezerse ninian hakarak ba ukun rasik-aan.

Nune’e Francesc Vendrell informa ba PR katak nasaun sira ne’ebé independente ona, sei hasoru dezafiu prinsipál tolu hanesan estadu direitu demokrátiku, sistema judisiáriu ne’ebé independente no la dependente ba rekursu ida de’it.

Nia rasik envolve-aan iha kampaña ba Timor-Leste nia ukun rasik-aan iha tinan 1980 nia laran no iha tempu bainhira apoiu ba kauza auto-determinasaun la dun ona hetan atensaun iha ONU.

Enkuantu Tamrat Samuel fasilita diálogu entre timoroan liuhosi All-Inclusive intra East Timorese Dialoguehusi 1994-1998.  

Francesc Vendrell hamutuk ho Tamrat Samuel sai figura prinsipál ba kampaña Timor-Leste nian  iha ONU, hodi konsege influénsia atu ONU hahú haruka nia delegasaun mai Timor-Leste ba dahuluk, nune’e mós sira envolve iha planu implementasaun referendu ho estabelesimentu misaun UNAMET.

Ho dedikasaun figura prinsipál rua ne’e, iha tinan2009, eis Prezidente Repúblika, José Ramos Horta kondekora ho Ordem de Timor-Leste.

Atuál Xefe Estadu sei entrega kondekorasaun ba Francesc Vendrell no Tamrat Samuel ho Ordem Timor-Leste iha Serimónia Komemorasaun Tinan-20 Aniversáriu Referendum.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here