DILI, 29 agostu 2019 (TATOLI)-Ministru Estadu Seniór, Ministru Relasaun Esterna no Defeza Sigapura, Mohamad Maliki bin Osman, lori Estadu Singapura nia naran kongratula ba povu Timor-Leste ne’ebé selebra Loron Konsulta Populár ba dala-20 iha 30 agostu ne’e.
“Ami-nia povu no Estadu fó kongratulasaun ba ita-boot sira tanba bele kovida ami mai partisipa iha selebrasaun Loron Konsulta Populár ba dala-20 ne’e”, Seniór Ministru Maliki iha aeroportu Nicolau Lobato, Dili, ohin.
Nia salienta Estadu Singapura sei kontinua apoia Timor-Leste iha área seguransa, ekonomia sosiál atu Timor-Leste bele dezenvolve liútan.
“Ami kontinua apoia atu Timor-Leste tama ASEAN, maibé importante Timor-Leste tenke hahú prepara aan daudaun no ha’u haree iha ona progresu”, katak.
Seniór Ministru Maliki Osman to’o iha Aeroportu Nicolau Lobato ho Aviaun Citilink ho Númeru QG 7300 ne’ebé simu direita husi Ministru Obra Públika Salvadór Eugenio Soares dos Reis Pires.
Jornalista : Florencio Miranda Ximenes
Editor : Maria Auxiliadora
