Kompetisaun Lee Poema husi joven sira, ámbitu selebrasaun tinan 20 konsulta populár iha CCD, segunda 12 Jullu 2019. Imajen Egas Cristovão

DILI, 29 agostu 2019 (TATOLI) – Xefe Aldeia 03 Anin Fuik Ai-tarak Laran, Suku Kampung Alor, Postu Administrativu Don Aleixo, Munisípiu Dili, Frangelino Maia, husu ba ninia joven sira atu kontribui ba dame no hakmatek, hodi aselera prosesu dezenvolvimentu Nasaun no povu.

Xefe Aldeia 03 Anin Fuik Ai-tarak Laran, Suku Kampung Alor, Postu Administrativu Don Aleixo, Munisípiu Dili, Frangelino Maia. Imajen TATOLI/Osoria Marques

“Husu ba joven sira katak imi mak kontinua Nasaun ne’e nia futuru, entaun hakmatek ba no kontinua estuda iha área hotu-hotu hodi ukun, ikus ba nasaun doben ida ne’e”, nia apela liuhosi TATOLI iha Kampung Alor, kinta (29/8).

Lia-menon ne’e relasiona ho selebrasaun tinan 20 loron konsulta populár 30 agostu 1999-2019 no prezensa Forsa Internasionál ba Timor-Leste (INTERFET-sigla inglés).

Nia re-lembra tinan 20 liubá povu barak maka hetan oho, torturasaun no intimidasaun  husi grupu pro-integrasaun, tanba ne’e  jerasaun foun sira ohin loron presiza tane aas valór ukun rasik án hodi kontribui ba dame no hakmatek.

Lider Komunitária ne’e rekoñese dezenvolvimentu nasaun dadaun ne’e la’o ona maibé presiza aselera liután hodi hasai povu husi ki’ak.

Xefe Suku Fatuhada, Postu Administrativu Don Aleixo Dili. Imajen TATOLI/Osoria Marques

Iha biban seluk, Xefe Suku Fatuhada, Postu Administrativu Don Aleixo Dili,  hatete dezenvolvimentu konsentra iha kapitál, tanba ne’e presiza atu desentraliza ona to’o baze, liliu hadi’a liután iha setór eletrisidade, saúde, edukasaun no seluk tan.

Jornalista: Osoria Marques

Editora: Rita Almeida

HAKEREK NO HATÁN

Please enter your comment!
Please enter your name here