Deputada hosi Parlamentu Nasionál França, Pascale Boyer, hasoru malu ho Prezidente Repúblika, Francisco Guterres Lú Olo. Imajen Mídia PR

DILI, 28 agostu 2019 (TATOLI)—Deputada hosi Parlamentu Nasionál França, Pascale Boyer,  hasoru malu ho Prezidente Repúblika, Francisco Guterres Lú Olo, iha Palásiu  Prezidente Nicolau Lobato, ohin.

Iha hasoru malu ne’e, Xefe Estadu husu deputada refere atu hametin liután kooperasaun Uniaun Europeia hodi koloka nafatin Embaixadór ba Timor-Leste.

Prezidente Repúblika mós hato’o importánsia kooperasaun Uniaun Europeia iha Timor-Leste ba dezenvolvimentu nasionál tanba Uniaun Europeia nu’udar parseiru estratéjiku ba Timor-Leste iha tinan naruk.

Hafoin enkontru, Pascale Boyer hateten, nu’udar Prezidente ba Grupu Parlamentár França-Timor-Leste, agradese ba  konvite hosi Estadu Timor-Leste tanba bele partisipa iha loron istóriku ne’e (Konsulta Populár ba dala 20).

Nia hatutan, haree ba importánsia edukasaun, ba oin, Uniaun Europeia sei haree poténsia kooperasaun iha área refere.

Kooperasaun Uniaun Europeia iha Timor-Leste konsentra ba área nutrisaun, kombate deflorestasaun, produsaun agrikultura, kombate korupasaun, hadi’ak finansa públika, Parlamentu Nasionál, Tribunál Rekursu, boa governasaun, diversifikasaun ekonomia no desentralizasaun

Uniaun Europeia nu’udar parseiru estratéjiku ba Timor-Leste ba tinan naruk. Uniaun Europeia hamutuk ho Nasaun Unida foin lansa programa Spotlight Initiative ba tinan naruk ho osan hamutuk millaun €500 ba kampaña kontra violénsia hasoru feto. Inisiativa ne’e Uniaun Europeia mak sai kontributór prinsipál. Ba Timor-Leste, Uniaun Europeia sei aloka millaun €12.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here