DILI, 28 agostu 2019 (TATOLI)—Jogu Tasa 12 Novembru dadaun ne’e tama ona ba faze kuartu finál, iha ne’ebé klube ualu mak sei hasoru malu hodi buka sorte hakat ba semi finál.

Antes ne’e, klube 20 mak kompete ba tasa refere maibé klube ualu de’it mak susesu tama to’o kuartu finál mak hanesan Atlético Ultramar, Lalenok United FC, Assalam FC, Aitana FC, AD SLB, Lika-Lika Lemorai, Académica FC no Boavista FC Timor.

Enkuantu, klube hirak ne’ebé la konsege tama mak hanesan Zebra FC, Cacusan FC, FC Lero, Santa Cruz FC, Karketu FC, DIT FC, Portu Taibessi, AS Ponta Leste, Kablaki FC, Nagardjo FC no Fitun Estudante FC.

Loraik ne’e (28/8), Atlético Ultramar sei hasoru Lalenok United FC hodi buka sé loos mak atu hakat ba semi finál.

Treinadór Lalenok, Yance Matmei ba Agência Tatoli via telefónema, ohin, hateten, nia esforsu maka’as nune’e bele manán Ultramar. “Ha’u esforsu hela nune’e bele manán Ultramar. Ami sei hatudu jogu ne’ebé sériu,” tenik Yance.

Iha sorin seluk, Prezidente Ultramar, Ano Gusmão hateten Ultramar sempre foku nune’e bele manán hodi marka tan istória. “Ami preparadu no foku hela ba jogu ne’e,” nia informa.

Antes ne’e, Ultramar sai ona kampiaun époka rua tutuir malu no Ano Gusmão hakarak Ultramar kampiaun tan iha époka ida ne’e (2019).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here