Sekretáriu Estadu Juventude no Desportu, Nélio Isaac Sarmento. Imajen Tatoli/ Egas Cristóvão

DILI, 28 agostu 2019 (TATOLI)—Timor-Leste nia totál populasaun hamutuk 1,167,242 (mane 588,561 no 578,681). Hosi númeru populasaun ne’e, maioria gosta liu prátika desportu.

Tanba ne’e, Sekretáriu Estadu Juventude no Desportu, Nélio Isaac Sarmento, hateten maioria populasaun gosta involve-aan iha desportu maibé sistema mak seidauk monta ho di’ak.

“Intermu fíziku, maioria populasaun Timor-Leste gosta prátika desportu, maibé sistema ne’ebé monta atu fasilita desportu seidauk kompletu,” tenik Nélio ba Agência Tatoli iha edifísiu Sekretaria Estadu Juventude no Desportu (SEJD), Lecidere, Dili, ohin.

Nia dehan, polítika Governu nian atu investe osan iha área desportu nian hodi hasa’e kualidade atleta sira nian dadaun ne’e sei menus

“Polítika Governu nian atu dezenvolve desportu mak hanesan ita monta uluk lai sistema, liliu haree mós ba enkuadramentu legál sira liga liu ba lei desportu nian. Sistema ne’e mak atu ko’alia no haree dezenvolvimentu atleta desportiva ne’e hosi ne’ebé, ita hahú hosi jogu eskolár ka, jogu tinan ki’ik ka hahú kedas hosi tinan boot ka organizasaun desportiva,” Nélio subliña.

Ko’alia kona-ba organizasaun desportiva sira mak hanesan federasaun klube no seluk-tan. “Governu iha mandatu ida ne’e atu haree ba kestaun hirak ne’e. Haree planu ba infraestrutura halo didi’ak, monta sistema kompetisaum sira ho didi’ak no prepara atleta hirak ne’ebé selesionadu hodi defende ita-nia nasaun,” nia dehan.

Nia esplika, bainhira atu monta sistema tenke haree ba regulasaun enkuadramentu legál ne’ebé liga ba desportu, hanesan infraestrutura, no mós preparasaun ema Timor nian hodi simu desportu hanesan setór produtivu ida iha nasaun ne’e.

“Maibé, iha tinan 20 nia laran, prátika desportu komesa la’o di’ak ona. Ita konsege hetan prestasaun di’ak iha eventu internasionál lubuk ida liuhosi atleta difisiente sira no mós atleta normál sira. Atleta ida-rua la hetan mellór liu maibé hetan netik medalla. Hosi sira ne’e hotu hanesan motivasaun ida ne’ebé bele motiva atleta sira seluk,” Nélio haklaken.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here