Komandante Komandu Operasionál Nasionál (KKON), Superintendente Xefe, Pedro Belo. Imajen/Eugénio Pereira

DILI, 28 agostu 2019 (TATOLI)-Komandu Polisia Nasionál Timor-Leste (PNTL) hasai ona sirkulár ida hodi aviza no bandu ba grupu organizasaun no sosiedade sivíl Timor-Leste atu halo asaun demonstrasaun dame no entrega kualkér karta petisaun ba bainaka internasionál durante ámbitu komemorasaun loron Konsulta Populár (Referendu) ba dala-20 (30 Agostu 1999 – 30 Agostu 2019) ho misaun INTERFET nian, 20 Setembru 1999.

Komandante Komandu Operasionál Nasionál (KKON), Superintendente Xefe, Pedro Belo dehan, ba grupu no membru sosiedade sivíl halo asaun PNTL sei atua tuir lei.

“Komandu PNTL bandu ba grupu organizasaun no mós movimentu sira ba interese estadu no mós  interese nasionál  apartir loron 27 agostu 2019 ba oin, sei la halo manifestasaun  no marsa da pás  iha Munisípiu Dili no munisipiu, no bandu atu entrega karta petisaun ruma ba bainaka internasionál no ba embaixada sira hotu iha Dili. Ba grupu organizasaun no movimentu sira ne’ebé la kumpre orientasaun PNTL sei aplika lei atu halo atuasaun,” afirma Superintendente Pedro Belo, ohin, ba jornalista liu husi konferénsia imprensa iha Kuartél Jerál PNTL, Caicoli, Dili.

Pedro Belo alerta atu grupu sosiedade sivíl atu labele halo demonstrasaun dame iha kualkér fatin hodi bele fó susesu ba programa komemorasaun loron konsulta populár tuir ajenda estadu nian.

Nia dehan, se grupu sira ne’e kontinua halo asaun ruma, maka PNTL sei atua situasaun tuir lei númeru 1/2016 kona-ba liberdade ba reuniaun no manifestasaun artigu 10 pontu 1 too 4.

Komandu PNTL rasik hasai ona avizu ho pontu importante haat (4) ba kualkér grupu sira atu tau konsiderasaun; 1). Ba grupu no ema se de’it maka hakarak realiza manifestasaun iha fatin públiku ka nakloke ba públiku tenke fó sai avizu eskrita ba komandu PNTL kona-ba sira nia objetivu jerál mínimu loron haat (4) nia laran ba autoridade sivíl ka polisia.

2). Iha avizu ne’e tenke asina husi promotor na’in lima tau sira nia naran kompletu ho hela fatin no profisaun servisu kompletu, no ba ema koletivu tenke asina husi organizasaun diresaun nian.

3). Avizu ne’e tenke tau obrigatóriu indikasaun ba asaun oras, no fatin ba objetivu reuniaun nian.

4). Aviza ba entidade sira ne’ebé mak simu avizu tenke fó sai dokumentu komprovativu prestasaun  nian.

Pedro Belo husu kolaborasaun ba grupu juventude, estudante sira hotu inklui autoridade lokál no organizasaun sosiedade sivíl atu koopera ho Komandu PNTL atu bele asegura seguransa iha Timor-Leste la’o ho ámbitu dame.

Bainhira jornalista husu kona-ba grupu organizasaun sosiedade sivíl balun ne’ebé preparadu halo asaun no entrega karta petisaun bainaka internasionál apoia povu Papua hetan ukun rasik aan,  Komandante Pedro dehan, PNTL nia parte simu ona informasaun no sei atua situasaun tuir lei bainhira grupu ne’e halo asaun.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here