Taur Matan Ruak, Primeiru-Ministru Oitavu Governu.

DILI, 28 agostu 2019 (TATOLI) – Iha komemorasaun tinan 20 Konsulta Populár, Primeiru-Ministru (PM), Taur Matan Ruak, konsidera luta ne’ebé durante ne’e povu Timor-Leste konkista ona la fásil, tanba timoroan barak ho sakrifísiu, abnegasaun no eroizmu hodi fó sira nia vida no tempu ba ita nia rain.

“Povu Timor-Leste, iha tinan 20 liubá ita konkista ona ita-nia liberdade no hakotu ita-nia luta ba independénsia, no loron ida ohin importante tebes ba ita-nia istória koletiva, hanesan povu no hanesan nasaun”, tenik Xefe Governu iha Palásiu Governu, kuarta ne’e.

Nia rekoñese, maski iha difikuldade no dezafíu oioin, maibé ita loke ona kapítulu foun ida ba dezenvolvimentu rain ne’ebé benefisia ona ba dame, seguransa no ekonomia ne’ebé buras dadaun.

“Timor-Leste kontinua sai kazu susesu ba Organizasaun Nasaun Unida (ONU), nomós ezemplu ba mundu tomak. Mai ita hamutuk hodi kontinua ita-nia luta ba moris di’ak, parabéns ba Timor-Leste, parabéns ba povu”, dehan PM.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here