Delegasaun Ministru Desenvolvimentu Ekonómiku, Desenvolvimentu Urbanu no Transporte Nova Zelandia, Phil Twyford hasoru malu ho Ministru Reforma Lejislativa no Asuntu Parlamentár no Ministru Koordenadór Asuntu Ekonómiku ein ezersísiu, Fidelis Manuel Leite Magalhães, Imajen/Mídia-MRLAP

DILI, 28 agostu 2019 (TATOLI) – Ministru Desenvolvimentu Ekonómiku, Desenvolvimentu Urbanu no Transporte Nova Zelandia, Phil Twyford, ho ninia delegasaun hasoru malu ho Ministru Reforma Lejislativa no Asuntu Parlamentár no Ministru Koordenadór Asuntu Ekonómiku ein ezersísiu,  Fidelis Manuel Leite Magalhães.

Delegasaun ne’e mai hodi partisipa komemorasaun tinan 20 Konsulta Populár no Misaun INTERFET iha Timor-Leste.

Tuir Portál Ofisiál Governu, Ministru Phil Twyford manifesta disponibilidade atu Nova Zelandia bele hametin kooperasaun ho Timor-Leste iha área Turizmu no área seluk, inklui dezenvolvimentu urbanu no teknolojia dijitál.

Ministru Desenvolvimentu Ekonómiku, Desenvolvimentu Urbanu no Transporte Nova Zelandia, Phil Twyford no Ministru Reforma Lejislativa no Asuntu Parlamentár no Ministru Koordenadór Asuntu Ekonómiku ein ezersísiu, Fidelis Manuel Leite Magalhães hasoru malu iha Palásiu Governu, kuarta (28/8).Imajen/Mídia-MRLAP

Nia mós rekoñese rezultadu ne’ebé alkansa ona desde referendu no independénsia tanba iha tinan kotuk liubá nia rasik hanesan ativista ne’ebé apoiu kazu Timor-Leste.

Ministru Fidelis hateten kooperasaun bilaterál entre nasaun rua ne’e la’o ho di’ak no nia mós aprezenta ba ninia omólogu kona-ba prioridade Governu ba diversifikasaun ekonomia.

Nia subliña, agora dadauk turizmu no industria hanesan perioriade Governu ba dezenvolvimentu ekonómiku emprezariál tanba hanesan setór ne’ebé bele hetan rezultadu lais liu ba diversifikasaun.

Dezenvolvimentu turizmu no setór emprezariál iha Timor-Leste hanesan perioriade kooperasaun bilaterál entre nasaun rua ne’e desde 2011.

Governu Nova Zelandia mós atribui ona bolsa estudu barak ba estudante timoroan iha Universidade Nova Zelandia.

Ministru Fidelis akresenta, Governu nafatin tau atensaun ba dezenvolvimentu komérsiu, ne’ebé hanesan perioridade ba prosesu adezaun país ba Organizasaun Mundiál Komérsiu, no nia mós iha esperansa bele dinamiza setór komersiál hodi bele aprezenta rezultadu.

Kooperasaun bilaterál entre nasaun rua ne’e bele kontribui ba formasaun kuadru médiku no superiór sira ba setór trurizmu, nomós aselera akizisaun know-how, ne’ebé espesializadu ba tékniku nasionál.

Jornlista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here