Koordenadora Grupu Feto Buka Rasik, Milena dos Santos. Foto TATOLI: Tomé Amado

DILI, 28 agostu 2019 (TATOLI) – Grupu soru Tais Feto Buka Rasik, husi Munisípiu Bobonaro, durante ne’e garante ninia kualidade Tais husi ai-ben Uskain ne’ebé foti husi Munisípiu Ermera.

Koordenadora Grupu Feto Buka Rasik, Milena dos Santos hateten, iha ai rua mak sira uza hodi hoban putus ka kabas ne’ebé sira prepara atu soru. Ai-neno sei foti de’it nia abut, ne’e fasil atu hetan tanba iha Marobo barak loos maibé ai-Uiskain difisil atu hetan  tanba la moris iha Marobo no mós iha Munisípiu Bobonaru.

“Ami tenke sai husi Marobo ba Ermera hodi foti ai-Uskain, ai ne’e moris de’it iha rai malirin. Ami uza ai rua ne’e nia abut no tahan depois hodi hoban putus durante oras 24 nia laran depois habai fali to’o maran mak foin fase fali hodi hatene kualidade kabas nian. Kuandu kór sai tenke hoban fali,” informa Koordenadora Milena dos Santos ba Ajénsia TATOLI iha Sentru Konvensaun Dili (CCD-sigla portugés), kinta (28/08/2019).

Koordenadór ne’e informa, Tais Munisípiu Bobonaru nian iha ninia orijen mak hanesan Tais Sabu, Tais Bodato, Tais Larlipa no Tais Tadan. Tais sira ne’e iha ninia istória husi tempu bei’ala sira nian. “Tais Sabu no Tais Bodato ne’e liurai sira mak hatais.  Tais rua ne’e soru tenke uza ninia luan iha tais ninis sira no tais Larlipa no Tadan halo ba reinu sira maibé laiha fuan soru loos de’it”.

Nia dehan, agora daudaun tais sira ne’e iha nafatin ninia valór. Ninia orijen nafatin maibé jerasaun ohin loron kontinua soru maibé di’ak liu tais sira ne’ebé avo sira halo.

Uluk avo bei’ala sira halo maibé la garante ninia kualidade. Ohin loron modernu ona presiza garante ninia kualidade atu nune’e bele promove identidade kultura ida di’ak no loos. Agora ema husi rai li’ur barak mak hakarak hetan Tais Bobonaru husi Marobo tan ne’e tenke mós hatudu ba sira ho ninia kualidade.

Tais Metan Bodato agora estranjeiru sira mak sosa barak liu tanba iha duni ninia kualidade. Iha kompetisaun, tais ne’e mak Bobonaru lori mai iha Dili ne’e motif Tais Metan Bodato.

Iha biban hanesan, Koordenadora Milena dos Santos sujere atu hanoin netik sira liu husi fundus ruma atu nune’e ninia grupu ne’e bele  kontinua hetan fatin di’ak ida atu prodús liután tais orijen sira ne’e.

Notísia relevante:Grupu Kialau Promove Tais Sikalau Ratu Lautem

 Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here