Koordenadór Rezidente ONU nian, Roy Trivedy, hala’o enkontru ho Prezidente Repúblika, Francisco Guterres Lú Olo, iha salaun enkontru Nino Konis Santana, Palásiu Prezidente Nicolau Lobato, Bairru Pité, Dili. Imajen Mídia PR

DILI, 28 agostu 2019 (TATOLI)—Sekretáriu Jerál Organizasaun Nasaun Unida (ONU), António Guterres iha mensájen televiziva ne’ebé hato’o ba povu Timor-Leste iha ámbitu komemorasaun tinan 20 Referendu katak ho forsa multilateralizmu, diplomasia no solusaun polítika Timor-Leste inspira mundu.

Mensájen televiziva hosi Sekretáriu Jerál ONU nian ne’e hato’o ba Prezidente Repúblika liuhosi Koordenadór Rezidente ONU nian, Roy Trivedy no Reprezentante Programa Nasaun Unida ba Dezenvolvimentu (PNUD), Tuya Altangerel, ohin, iha salaun Enkontru Nino Konis Santana, Palásiu Prezidente Nicolau Lobato, Bairru Pité, Dili.

Hamutuk ho mensájen António Guterres nian, Nasaun Unida hato’o mós ba Prezidente Repúblika livru rua ho títulu: “Tinan 20 Timor-Leste – Hafoin Referendu: Konkinsta” no “Kronolojia Timor-Leste 1999-2019”. Livru rua ne’e ko’alia kona-ba eventu importante no istóriku sira ne’ebé Timor-Leste hetan iha tinan 20 nia laran hafoin referendu.

Aleinde ne’e, Nasaun Unida mós hato’o ba Prezidente Repúblika filme muzikál ho durasaun minutu haat resin, ne’ebé halo rezumu badak ida kona-ba pasájen istória Timor-Leste nian hafoin referendu no dalan sira ne’ebé Timor-Leste sei foti ba futuru.

Koordenadór Rezidente ONU, Roy Trivedy iha nia sorumutu ohin ho Xefe Estadu, lori Nasaun Unida nia naran kongratula povu Timor-Leste ne’ebé sei festeja tinan 20 Referendu no afirma mós ONU nia kompromisu atu kontinua serbisu hamutuk ho Timor-Leste.

Prezidente Lú Olo onradu teb-tebes bele hasoru malu ho reprezentante ONU nian iha Timor-Leste no mós haksolok tebe-tebes ho mensájen ne’ebé Sekretáriu Jerál ONU nian hato’o ba povu Timor-Leste.

Lú Olo afirma liután katak Timor-Leste atu ba oin, presiza líder sira tenke tau hanoin hamutuk no husu atu halo avaliasaun hodi hadi’a saida maka naksalak ona.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here