Adjunto Komandante PNTL Munisípiu Bobonaro, João da Costa. Imajen/Domingos Piedade Freitas

BOBONARO, 28 agostu 2019 (TATOLI)-Tribunál Distritál Suai (TDS) aplika Termu Identidade Rezidénsia (TIR) ba Timoroan na’in 13 ne’ebé polísia detein iha fronteira  terrestre iha semana kotuk tanba hakat fronteira ho ilegálmente.

Adjuntu Komandante Polísia Nasionál Timor-Leste Munisípiu Bobobaro, João da Costa, informa, alende fó TIR ba timoroan na’in 13 ne’e, TDS hasai mós desizaun indemnizasaun ba sidadaun indonézia na’in tolu ne’ebé akompaña timoroan hirak ne’e hodi hakat liu fronteira.

Sidadaun Indonézia na’in tolu ne’e selu ona indemnizasaun no deporta ona ba sira ninia nasaun orijen, foin lalais ne’e.

Iha audiénsia julgamentu, TDS la hetan faktu ne’ebé iha indikasaun forte komete ba atividade grupu ilegál hodi sa’e sintu iha Indonézia.

Timoroan na’in 13 mai husi Munisípiu Dili, Ermera, Likisá no Bobonaro tenke aprezenta periódika ba postu polísia ne’ebé daudaun ne’e sira pertense ba.

Ba Ajénsia TATOLI iha Jináziu Maliana, Munisípiu Bobonaro, tersa (27/08/2019), Komandante João da Costa, hateten durante prosesu investigasaun PNTL nian la deskobre  atributu grupu ilegál maibé deteta de’it sira lori manu no foos saka hamutuk ualu atu ba Atambua-Indonézia.

Polísia Munisípiu Bobanaro iha ona planu atu halo operasaun konjunta ho Polísia Militár (PM), Alfándega no Imigrasaun hodi prevene atividade ilegál sira ne’ebé tama no sai área Terrestre, Tasi entre Timor-Leste no Indonézia.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here