Ministra Edukasaun, Juventude no Desportu Dulce de Jesus Soares akompaina Embaxador Australia iha Timor Leste Peter Robert uainhira partisipa iha seremonia entrega kadeira no meja husi Lotari Club Australia iha Timor Leste ba Escola Ensino Baziku Filial Tasitolu Dili 28 Agostu 2019. Imajen/Antonio Goncalves

DILI, 28 agostu 2019 (TATOLI)—Embaixadór Austrália ba Timor-Leste, Peter Roberts, hateten Governu no Komunidade Australia nafatin iha komprimísiu tulun Governu no povu Timor-Leste hodi dudu setór edukasaun ba futuru ida di’ak liu.

Área edukasaun ne’e hanesan pontu prioridade husi Governu Austrália no TL atu haree no hamatan ba jerasaun foun sira bele asesu edukasaun ho fasilidade ne’ebé adekuadu hodi fasilita estudante sira sai matenek.

“Ha’u kontinua hein nafatin kooperasaun ne’e bele metin nafatin iha nasaun rua ne’e sai etin. Ha’u mós hein kooperasaun no apoiu sira ne’e bele kontinua mós ba eskola sira seluk iha nasaun ne’e,” dehan Embaixadór Austrália ba Timor-Leste, Peter Roberts, iha serimónia entrega kadeira no meza hamutuk 240 ba Eskola Ensinu Báziku Filiál 12 de Outubru, Tasi-Tolu, Dili, kuarta (28/08/2019).

Nia hatutan, projetu ne’e nu’udar kooperasaun di’ak ida atu hametin liután lasu amizade entre povu husi nasaun rua ne’e ho intensaun atu estudante sira iha Timor-Leste bele asesu ba edukasaun ho di’ak.

Reprezentante nasaun Australia ne’e husu ba estudante sira hotu atu tau prioridade ba edukasaun liuliu tenke badinas ba eskola no estuda makaas. Tanba, nasaun Timor-Leste nia futuru iha estudante sira-nia liman.

“Agradese ba ema ne’ebé envolve iha projetu ida ne’e ho intensaun hakarak dudu dezenvolvimentu edukasaun iha rai ida ne’e ba di’ak liu. Ne’e duni, ho esforsu makaas ema hotu nian loke ona espasu boot ba Governu Timor-Leste liuhusi Ministériu Edukasaun, atu tau prioridade liután ba eskola ensinu báziku sira iha Timor-Leste,” nia esplika.

Notísia relevante:Rotary Club Prontu Apoiu Kadeira no Meza Ba Eskola TL

Jornalista: Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here