Lansamentu fatuk dahuluk Monumentu Masakre 6 Abríl 1999 iha Munisípiu Liquiçá, tersa (27/8). Imajen/Evaristo Soares Martins

LIQUIÇÁ, 27 agostu 2019 (TATOLI) – Nu’udar Liquiçá-oan, Ministru Defeza, Filomeno Paixão de Jesus, agradese ba Prezidente Komisaun Organizadora Tinan 20 Aniversáriu Konsulta Populár, Kay Rala Xanana Gusmão, ne’ebé fó ona importánsia hodi harii Monumentu Masakre 6 abríl 1999, iha munisípiu Liquiçá.

“Ida ne’e ami expresa partikulár hanesan Liquiçá-oan, obrigadu wa’in ba ita nia maun boot Xanana, ba nia interese ne’ebé rona povu Liquiçá nia halerik hodi halo monumentu ne’e imediamente. Nia atende no nia fó inisiativa para ita ohin bele iha serimónia ida ne’e hodi hatúr primeira pedra ba monumentu ida ne’e”, tenik Filomeno Paixão iha ámbitu lansamentu fatuk dahuluk Monumentu Masakre Liquiçá, tersa ne’e.

Notísia Relevante: Governu Lansa Fatuk Dahuluk Monumentu Masakre Liquiçá

Nia lamenta tanba Xanana la partisipa iha seremónia ne’e, maibé nia komprende, la’ós tanba lakohi mai maibé servisu barak mak impede.

Nune’e, monumentu ne’e hodi hanoin hikas pasadu no ohin loron, hodi bele hala’o servisu iha eroi sira nia tutela no sira sei tau matan nafatin maski sira laiha ona.

“Hosi ne’e ba oin, ita espera katak ita hotu-hotu no Estadu nia obrigasaun, ita hotu hanesan sidadaun, liliu ba ita Liquiçá-oan para atu kontribui ho Estadu hodi halo saida mak bele kompleta obra ida ne’ebé ita haree iha ita nia kotuk”, nia katak.

Parte seluk, Prezidente Komisaun Organizadora, atuál Prezidente Autoridade Munisípiu Liquiçá, Domingos da Conçeição dos Santos ‘Makaro’, lori povu Liquiça agradese ba Xanana, tanba iha ona inisiativa hodi harii monumentu ne’e.

“Lori povu Liquiçá nian hakarak manifesta agradesimentu wain ba Maun Boot Kay Rala Xanana Gusmão ba rekoñesimentu tomak ba munisípiu Liquiçá, hodi membru nasaun G7+ vizita munisípiu ne’e, maski ami hasoru dezafiu maibé la sai obstákulu, tanba ho maun boot nia prezensa bele haboot tán ami nia fuan hodi enkoraza ami atu monumentu ida ne’e bele hamriik iha tinan ida ka rua mai”, nia dehan tan.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here