DILI, 28 agostu 2019 (TATOLI)-Ezbosu orgánika Autoridade Inspesaun Fiskalizasaun Atividade Ekonómika, Sanitária no Alimentár (AIFAESA-sigla portugés) Institutu Públiku (IP) iha ona Konsellu Ministru (KM) atu diskute no aprova.
Koordenadór AIFAESA.IP, Abílio Oliveira Sereno, esklarese, orgánika ne’e importante atu regula funsionamentu instituisaun, tanba ne’e, Governasaun da-ualu sei aprova hodi fó apoiu ba dezenvolvimentu instituisaun AIFAESA iha 2020.
Notísia Relevante : PDHJ Husu MECAE Kompleta Estrutura AIFAESA
Nia esplika, maske instituisaun ne’e foin harii iha tinan tolu liubá, maibé iha ona rekursu umanu sufisiente no kualifikadu atu prienxe servisu iha instituisaun ne’e.
Ba kargu Xefia balun hanesan Inspetór Jerál, Abílio Sereno rekoñese sei mamuk tanba seidauk hetan nomeasaun foun husi Governu. Maibé, tuir nia importante liu maka ema ne’ebé atu okupa kargu ne’e tenke iha kapasidade no koñesimentu aas hodi apoiu instituisaun.
“Ha’u hanoin serbisu iha AIFAESA lao di’ak hela soke orsamentu mak lato’o hodi utiliza ba fasilidade hanesan transporte, laboratóriu no armazén,” hateten Abílio Sereno, ohin, ba Ajénsia TATOLI iha nia servisu fatin, Matadoru, Dili.
Nia hateten, AIFAESA presiza transporte atu hala’o pasa-revista ba loja sira iha territóriu no halo pasa inspesaun ba armazén sira ne’ebé akumula sasán sira loja nian, inklui halo inspesaun ba restaurante no warung sira.
Tuir nia, kestaun importante liu maka formasaun rekursu umanu ba funsionáriu sira hodi garante kualidade instituisaun liuliu iha inspesaun no seluk tan.
Abílio Oliveira Sereno hatete, kna’ar ninia hanesan koordenadór iha instituisaun ne’e ida maka atu instala departamentu no prienxe rekursu umanu tuir nesesidade.
Jornalista : Osória A. Marques
Editór : Francisco Simões
