Família vítima funu, Ana Maria de Jesus dos Santos. Imajen Tatoli/Evas Cristóvão

LIQUIÇÁ, 28 agostu 2019 (TATOLI)—Família husu estadu atu fó importánsia ba vítima funu, tanba vítima sira ne’e mak loke mundu nia matan hodi realiza referedun iha 30 Agostu 1999.

“Estadu presiza tau importánsia ba vítima no família funu 1999 nian. Babain ami husu bebeik ba estadu atu tau-matan liu ba vítima funu tanba Masakre Liquiçá no masakre sira seluk iha territóriu mak loke mundu nia matan,” Família vítima funu, Ana Maria de Jesus dos Santos, ne’ebé nia la’en mós hetan oho iha Masakre 6 Abríl 1999 Liquiçá, ko’alia ba TATOLI iha Munisípiu Liquiçá, kuarta ne’e.

Lee mós: Rezolve Uluk Problema Veteranu Hafoin Haree Lei Reparasaun

Aat liu tan, nia haktuir, vítima funu to’o oras ne’e vulnerável liu, tanba Masakre Liquiçá ne’e ema barak mate iha ne’ebé husik hela feen no oan.

Ana informa, iha tinan hirak liu-ba bainhira selebra Loron Konsulta Populár no selebra Masakre 6 Abríl, sira ejize bebeik kestaun ne’e maibé ezijénsia hirak ne’e laiha solusaun.

Nia hatutan, ko’alia kona-ba justisa formál presiza tempu tanba impaktu hosi rekonsiliasaun, maibé estadu iha devér haree ba vítima sira-nia terus.

“Justisa formál ne’e katak lori autór ba tribunál. Ida ne’e ami sempre ejize. Maibé, ida ne’e demora tempu. Katak, bainhira justisa formál to’o mai vítima no autór balun mate ona, entaun atu lori sé,” Ana Maria kestiona.

Nia fó hanoin katak rekonsiliasaun la’o ona, entaun dalan di’ak liu-ba justisa sosiál ba vítima sira, tanba vítima balun hetan ona rekoñesimentu, maibé balun seidauk no sei moris ho vulnerável.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here