Diretór Luta Hamutuk José Alves da Costa. Imajen/ Egas Cristovão

DILI, 28 agostu 2019 (TATOLI)-Organizasaun Noun Governmental (ONG) Luta Hamutuk husu ba Estadu ho Governu atu fó  rekoñesimentu   ba vítima  no eroi sira ne’ebé  fó kontribuisaun ba luta  to’o mate durante tinan  1999.

José Alves da Costa nu’udar Diretór Ezekutivu Luta Hamutuk, husu atu Estadu hakerek mós vítima sira iha masakre 1999 nia naran no nia istória iha istória Timor-Leste nian.

“Ohin, ita komemora tinan 20 loron Konsulta Populár (30 agostu 1999-30 agostu 2019). Ita presiza halo reflesaun kle’an no  Estadu presiza fó rekoñesimentu ba vítima sira ne’e,” hateten Diretór Luta Hamutuk, José Alves da Costa ba Ajénsia TATOLI, ohin, iha Faról, Dili.

Iha tinan 20 liubá antes no depois anunsia rezultadu konsulta populár iha loron  4 setembru 1999,  povu Timor-Leste maioria maka  sai vítima husi asaun brutalismu militár Indonézia no milisia Pro-Autonomia  tanba konsege sunu uma no oho ema barak iha territóriu.

”Governu presiza fó atensaun atu valoriza kolen no sakrifisiu, tanba ne’e  oinsá ba identifika  fila-fali hodi hetan apresiasaun husi estadu,” José Alves hateten.

Diretór Luta Hamutuk ne’e agradese ba kontribuisaun husi  asua’in sira ne’ebé fó dedikasaun tomak ba luta durante tinan 24.

Jornalista         : Nelson de Sousa

Editór                : Francisco Simões

HAKEREK NO HATÁN

Please enter your comment!
Please enter your name here