Abertura Kompetisaun Semi-finál Sertame Nasionál ho tema “Das Cinzas à Reconciliação e Reconstrução do Desenvolvimento Nacional” ba ekipa 13. Foto: Felicidade Ximenes

DILI, 28 agostu 2019 (TATOLI)—Governu liuhusi Ministra Edukasaun Juventude no Desportu, ohin, hala’o abertura Kompetisaun Semi-final Sertame Nasionál ho tema “Das Cinzas à Reconciliação e Reconstrução do Desenvolvimento Nacional” ba ekipa 13 ne’ebé sai vensedór iha kada munisípiu.

Antes ne’e, kompetisaun refere halo iha nivel munisipál ne’ebé hahú hala’o iha loron 21-22 Agostu hodi kompleta tiha ona iha munisípiu 12 inklui Oe-Cusse (RAEOA). Ohin loron, ekipa 13 mak marka prezensa hodi hala’o kompetisaun semi-final no aban sei halo kompetisaun final ho materia kona-ba Timor-Leste nia istória.

“Ekipa 13 ne’e vensedór husi munisípiu 12 inklui RAEOA. Sira halo ni dezempeñu di’ak no sira ne’ebé manan iha nível munisípiu hetan segundu lugar, hetan ona preimu iha nível munisípiu no sira ne’ebé primeiru lugar  agora sira mai kompete fila fali ho sira-nia maluk husi munisípiu sira seluk iha Centro Convenções Dili,” dehan Ministra Edukasaun Juventude no Desportu, Dulce de Jesus Soares, iha ninia diskursu bainhira halo abertura ba Kompetisaun Semi-Final Sertame Nasionál ne’ebé hala’o iha Centro Convenções (CCD) (CCD), Merkadu Lama, Dili, kuarta (28/8/2019).

Nia esplika, atividade sira ne’e di’ak tebes no atividade ida ne’e hanesan programa importante ida iha Ministériu Edukasaun atu kada tinan kontinua halo sertame espesífiku ba istória Timor-Leste nian.

“Ita haree fila ba ita-nia oan sira ne’e kuaze sira hotu ne’ebé seidauk moris iha tinan 1999, entaun ita haree katak eventu ida ne’e la’ós de’it sira atu sai manan na’in maibé hanorin buat barak ba sira kona-ba ita-nia istória luta rezisténsia ukun rasik-aan ninian,” nia dehan.

Vensedór ba sertame ne’e, nia hatutan, estudante sira hetan kustu ba sira-nia estádia iha Dili no sira sei manan no hetan prémiu. Governu mós hanoin katak sira ne’ebé mak  manan iha futuru, Governu mós haruka sira ba halo estudu komparativu iha fatin ruma, atu nune’e sira bele sai motivadór  liután ba sira-nia estudu.

Entretantu, partisipa iha sertame nasionál ne’e husi Ministra Edukasaun Juventude no Desportu, Vise Ministru Edukasaun, Diretór Jerál Ministériu Edukasaun, reprezentante Centro Nacionál Chega,  Diretór Nasionál sira no Diretór Nivel Munísipu sira, inklui estudante sira iha 12 munisípiu inklui RAEOA ne’ebé mai kompete iha kompetisaun semi-finál ne’e.

Notísia relevante:Ministériu Edukasaun Ho CNC Realiza Sertame Faze Eliminatóriu Ba Estudante Sekundáriu Sira

Jornalista: Felicidade Ximenes

Editór     : Rafy Belo

HAKEREK NO HATÁN

Please enter your comment!
Please enter your name here