Prezidente Autoridade Munisipál Liquiçá, Domingos da Conçeição dos Santos ‘Makaro’

LIQUIÇÁ, 27 agostu 2019 (TATOLI)—Prezidente Autoridade Munisipál Liquiçá, Domingos da Conçeição dos Santos ‘Makaro’ rekoñese vítima no família matebian barak estadu seidauk tau-matan, maibé tratamentu haree ba enkuadramentu legál.

“Ha’u hanesan administradór, ha’u-nia kompeténsia limitadu tanba sistema governasaun sei sentraliza. Foin mak ita tama iha desentralizasaun administrativa. Seidauk iha desentralizasaun administrativa territoriál. Purtantu, liga ba tratamentu ba vítima sira seidauk dignu, ita trata neneik tanba RDTL nunka atu lakon”, nia esplika relasiona ho vítima Masakre Igreja Liquiçá ne’ebé ezije atu Estadu halo Lei Reparasaun ba vítima sira.

Lee mós: Vítima Masakre Liquiçá Husu PN Hamosu Lei Reparasaun

Nia akresenta, importante mak ho prinsípiu la’o neineik maibé beibeik hodi atinje meta ne’ebé estadu no povu hotu hakarak.

Nia haktuir, povu Timor-Leste selebra Loron Konsulta Populár 30 Agostu ba dala-20, maibé iha loron istóriku ne’e selebra ho tristeza haree ba kotuk no orgullu haree ba oin.

“Tinan 20 ba kotuk no agora ita la’o dadaun, iha buat rua ne’ebé sai perspetiva públiku no perspetiva pesoál iha sosiedade. Primeiru, ko’alia kona-ba tristeza no segundu ko’alia kona-ba orgullu. Orgullu tanba konsege konkista ukun rasik-aan. Triste tanba ita-nia ema lubuk ida, rihun ba rihun oferese sira-nia vida, sira-nia isin, sira-nia ruin no raan, feen, oan lakon ba funu ida ne’e”, nia dehan ba Agência TATOLI iha Munisípiu Liquiçá, tersa ne’e.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here