Simbolu Grupu Riin Besi Asu Tali Be Korrente hatais. Imajen/RTTL.EP

DILI, 26 agostu  2019 (TATOLI)-Komandante Komandu Operasionál Nasionál (KKON), Superintendente Xefe, Pedro Belo dehan, parte PNTL hein hela orden atu halo kapturasaun ba grupu ilegál balun ne’ebé daudaun ne’e kontra hamutuk hela iha Suku Madohi, Munisípiu Dili nian.

Notísia Relevante :PNTL ho F-FDTL Detein Ema Nain 70 Nu’udar Grupu Rin Besi Asu Tali Be Korrente 

Komandante Operasaun Nasionál PNTL, Superintendente Xefe Pedro Belo. Imajen/ Egas Cristovão

Pedro Belo dehan, parte PNTL identifika ona grupu pertense husi Rin Besi Asu Tali Be Korrente (RBTBK) sira ne’e tuir planu atu partisipa iha festa konsulta popular iha loron 30 agostu agora iha Tasi Tolu Dili. Tanba ne’e parte PNTL sei halo koordenasaun ho Ministériu Públiku hodi haree ezisténsia no objetivu loloos grupu sira ne’e.

“Se grupu sira ne’e nu’udar povu Timor-Leste iha direitu atu bele partisipa festa konsulta populár ba tinan 20. Se nia mai ho organizasaun ne’e mak ilegál, entaun nia la iha direitu atu ba tuir festa ne’e, tanba lei la fó fatin para grupu ilegál tuir serimónia ne’ebé estadu organiza maka polisia sei halo atuasaun,” dehan Pedro Belo ba jornalista iha Akademia Polisia, Comoro Dili, ohin.

Nia dehan, parte PNTL kontinua akompaña hela atividade grupu ilegál Rin Besi Asu Tali Be Korrente (RBTBK) iha Suku Madohi.

“Ami nia ekipa akompaña hela sira no ami sei koordena ho ministériu públiku atu polisia labele viola fali lei, para ita atua grupu ilegál sira ne’e,” afirma Pedro.

Jornalista sira tenta konforma ho Portavós Grupu  Rin Besi Asu Tali Be Korrente (RBTBK) iha Suku Madohi- Comoro, lakohi hatudu aan atu fó komentáriu ba média.

Antes ne’e, liu husi koordenasaun servisu, PNTL Munisipiu Aileu no Komandu FALINTIL-Forsa Defeza Timor-Leste, kaptura lideransa no membru grupu ilegál Rin Besi Asu Tali Be Korrente hamutuk  ema na’in 70-liu  bainhira hala’o atividade no movimentu iha Munisipiu Aileu.

Grupu ilegál RBTBK kompostu husi ferik, katuas no joven feto mane sira ne’e mai husi Munisípiu, Baucau, Liquiça, Covalima no Bobonaro ho karreta trek boot azúl ho xapa matrikula, 54203 ho naran Ema Kiak Moris ho Badiu no baskulante kinur xapa, 57850 ho naran Mr. Fina Mengoda.

Grupu sira ne’e  tula besi riin boot ida ne’ebé kesi metin inklui krús mean hakerek Timor Sakrifisiu, Raan Fakar inklui atributu salenda mean no mutin ne’ebé grupu sira uza atu hasa’e hamutuk ho besi riin mean iha  Aileu.

Jornalista : Eugénio Pereira

Editór       : Francisco Simões

 

HAKEREK NO HATÁN

Please enter your comment!
Please enter your name here