Festivál Kultura Rezisténsia Populár ho tema “Husi Akudesan ba Rekonsilisaun no Dezenvolvimentu Nasionál 1999-2019”, iha CCD, tersa (27/8). Imajen: Hortençio Sanchez

DILI, 27 agostu 2019 (TATOLI) – Primeiru-Ministru (PM), Taur Matan Ruak, hateten atividade Festivál Kultura Rezisténsia Populár (FKRP) importante tebes hodi selebra tinan 20 Konsulta Populár iha 30 agostu.

“Festa ida ne’e importante los, festa ida ne’e hola parte iha serimónia lubuk ida ne’ebé mak ita halo iha ita nia rain, hodi komemora tinan 20, hafoin ita halo referendum no bainhira ita hili Timor-Leste sai ukun-an ou kontinua ho Indonezia, maibé iha momentu ne’ebá pursentu 78 hili ukun-an”, tenik Taur iha Sentru Konvensaun Dili (CCD-sigla Portugés), tersa kalan ne’e.

Primeiru-Ministru, Taur Matan Ruak, akompaña husi ninia espoza, Isabel Ferreira, partisipa iha atividade Festivál Kultura Rezisténsia Populár, iha CCD, tersa (27/8). Imajen/Hortençio Sanchez

Xefe Governu dehan, tanba ne’e ohin loron Timor-Leste hamrik nu’udar nasaun ne’ebé iha nia órgaun Estadu rasik mak Repúblika Demokrátika Timor-Leste (RDTL).

“Ho nune’e ha’u lori ita hotu nia naran, hato’o obrigadu ba sira ne’ebé iha momentu 1999, ne’ebé la tauk mate no terus hodi ba tau sira nia votu, no iha momentu ne’ebá Organizasuan Nasaun Unida (ONU) realiza referendum, la-haluha fó mós onra ba sira ne’ebé mate. Ita husu ba Aman Maromak atu hara’ik fatin naroman ba Sira”, subliña Taur.

Entretantu festivál kalan kulturál ho tema “Husi Akudesan ba Rekonsilisaun no Dezenvolvimentu  Nasionál 1999-2019”, partisipa hosi munisípiu 12 inklui Rejiaun Administrativu Espesiál Oé-cusse Ambeno (RAEOA), hodi aprezenta sira nia dansa kultura, poezia no koru, nune’e bele konkorre hodi hetan vensedór hodi bele partisipa iha komemorasaun loron referendum.

PM Taur partisipa atividade ne’e, akompaña mós husi ninia espoza, Isabel Fereira.

Nune’e mós partisipa husi membru Governu balun hanesan, Vise Ministra ba Kuidadu Saúde Primária, Elia Amaral no Sekretáriu Estadu Arte Kultura Teofilo Caldas.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here