Jogadór Juvenil AS Ponta Leste. Imajen Tatoli/ Hortençio Sanchez

DILI, 27 agostu 2019 (TATOLI)—Jogadór Juvenil U-16 AS Ponta Leste hamutuk na’in 26 dadaun ne’e hala’o hela treinamentu.

Treinadór Juvenil U-16, Gaspar Pinto ba Agência Tatoli, ohin, iha kampu Federasaun Futeból Timor-Leste (FFTL), Bairro Formosa, Dili, hateten jogadór juvenil Ponta Leste preparadu ona atu kompete ho jogadór juvenil hosi klube seluk ne’ebé hamahan-aan iha Primeira Divizaun Liga Futeból Amadora (LFA).

“Jogadór U-16 Ponta Leste nian agora preparadu ona. Aban, sira simu ona farda hodi hahú sira-nia kareira hanesan jogadór Ponta Leste nian iha faze juniór,” dehan Gaspar.

Nia haktuir, jogadór na’in 26 antes ne’e hala’o hela treinamentu iha Sentru Juvenil FFTL nian durante tinan rua ona.

Relasiona ho fasilidade treinamentu ba jogadór hirak ne’e seidauk sufisiente, tanba ne’e treinadór refere fiar ba oin klube sei fasilita.

Iha fatin hanesan, jogadór Cláudio Faria Martins ne’ebé hetan fiar hosi Ponta Leste atu joga iha faze juvenil Ponta Leste nian sente kontente tanba bele hetan oportunidade sai hanesan jogadór juvenil Ponta Leste nian.

“Ha’u sente kontente loos bele hamutuk ho Ponta Leste. Fiar katak ba oin ha’u bele hetan esperiénsia ne’ebé di’ak liu-tan hodi mellora ha’u nia kapasidade iha futeból,” tenik Cláudio.

Entretantu, antes ne’e, FFTL no Liga Futeból Amadora (LFA) anúnsiu sai ba públiku katak iha outubru nia laran sei realiza liga juvenil U-16 entre klube ualu ne’ebé hamahan-aan iha LFA époka 2019 ne’e.

Oras ne’e, prosesu rejistrasaun la’o hela no maioria klube mak submete ona dokumentu ba FFTL no LFA tuir regra Asian Football Confederation (AFC) nian.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here