Ministru Interiór Interinu, Filomeno da Paixão de Jesus. Imajen António Goncalves

DILI, 26 agostu 2019 (TATOLI)– Governu liu husi Ministériu Interior kontinua halo koordenasaun servisu ho Komandu Polisia Nasionál Timor-Leste (PNTL) kona-ba  preparasaun seguransa ba eventu boo tolu ne’ebé sei realiza iha Timor-Leste.

Governu konsidera ámbitu komemorasaun Aniversáriu XX Loron Konsulta Populár (30 agostu 1999-2019) no Misaun INTERFET nian iha 20 setembru 1999 no ajenda adezaun Timor-Leste ba membru ASEAN importante tebes atu halo preparasaun husi parte seguransa nian.

“Tanba eventu boo tolu kedas atu mai (selebra) iha loron 30 Agostu Konsulta Populár no 20 Setembru loron INTERFET nian no ita ko’alia mós ita nia estrada ba ASEAN, tanba eventu boot tolu ne’e importante, entaun ha’u mai ko’alia ho komandu PNTL hodi haree preparasaun sira ne’e hotu,” informa Ministru Defeza no Ministru Interiór Interinu, Brigadeiru Jenerál Filomeno da Paixão de Jesus, ohin, ba jornalista, hafoin enkontru iha Akademia PNTL, Comoro, Dili.

Ministru dehan, agora daudaun Komandu PNTL no F-FDTL kria liña koordenasaun seguransa hodi asegura seguransa ba bainaka importante sira ne’ebé tama ona lista hodi vizita mai Timor-Leste.

Entretantu kona-ba kestaun seguransa preparasaun Timor-Leste atu adere ba ASEAN, Ministru Filomeno ho onestu deklara Timor-Leste presiza prepara didi’ak kondisaun.

“Ha’u onestu de’it tantu PNTL no F-FDTL atu tama ba ASEAN ne’e ita seidauk   iha preparasaun sufisiente intermus formasaun, treinamentu balun iha ona seidauk too no presiza liután formasaun kapasita didi’ak ita nia ofisial sira metin didi’ak mak ita ba  ne’e kapás lai,” dehan Ministru Filomeno.

Ministru Filomeno hateten, Governu rasik haree ona prosesu tomak ba preparasaun adezaun Timor-Leste ba ASEAN no sei haree husi kestaun seguransa, ekonomia no polítika rai laran Timor-Leste tenke di’ak.

Governu kontinua husu ba Komandu PNTL no F-FDTL hodi atu hametin liña koordenasaun servisu no koopera ho autoridade no povu tomak hodi bele garantia seguransa.

Tuir Ministru katak, atu garante seguransa la’o di’ak la’ós kestaun servisu rua nian de’it, maibé presiza kontribuisaun másimu husi povu, lider partidu polítiku inklui kontribuisaun sosiedade sivíl hodi apoia Timor-Leste iha kontestu polítika no seguransa bele la’o di’ak nafatin.

“Polisia nia servisu ne’e loro-loron tenke besik ho populasaun hanesan amigu para populasaun haree ita tomak tiha no labele halo buat sala,” tenik nia.

Iha fatin hanesan, Komandante Komandu Operasionál Nasionál (KKON), Superintendente Xefe, Pedro Belo dehan, parte Polisia Korpu Seguransa Pesoál (CSP-sigla portugés) koordena ho Polisia Militár F-FDTL hodi asegura seguransa ba bainaka importante sira ne’ebé hala’o vizita mai Timor-Leste.

“Preparasaun la’o di’ak, ita nia CSP mós halo ona koordenasaun Polisia Militár para fó seguransa ba bainaka VIP hotu- hotu  no preparadu mós fó seguransa ba fatin serimónia iha Tasi Tolu,” dehan Pedro Belo.

Nia hatutan, PNTL mós simu ona lista husi komisaun organizadora tuir planu iha semana ne’e bainaka internasionál balun sei halo vizita ba Postu iha Batugade no liu ba Atambua Indonézia.

Jornalista: Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here