Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu, Dili, Tersa (27/08/2019). Imajen/TATOLI.

DILI, 27 agostu 2019 (TATOLI) – Governu liuhosi desizaun Konsellu Ministru (KM) estraordinária, aprova proposta husi Ministériu Edukasaun, Juverntude no Desportu (MEJD), ne’ebé aprezenta ona iha semana kotuk, kona-ba planu kooperasaun ho Portugal atu reforsa kapasidade profesór sira, hodi hanorin lian portugués.

“Konsellu Ministru aprova no ohin fó plenu puder ba ba Ministra Edukasaun, Juventude no Desportu, Dulce de Jesus Soares atu avansa asina ho Portugal hodi hahú implementasaun”, tenik Ministru Estadu Prezidénsia Konsellu Ministru, Hermenegildo Augusto Cabral Pereira ba jornalista sira, iha Palásiu Governu, tersa ne’e.

Kooperasaun ne’e ba Projetu PRO-Portugés, parseria ida entre MEJD, INFORDEPE no Institutu Kooperasaun no Lian nian (Camões).

Notísia Relevante: MEJD Prevee 14 Millaun Realiza Formasaun Portugés Ba Profesór Sira

Projetu ne’e atu kontribui ba konsolidasaun husi sistema edukativu Timor-Leste nian, liuhusi apoiu ba setór formasaun profisionál no kontínua husi pesoál dosente ba sistema edukativu ensinu, maibé la’ós superiór.

Nune’e mós, atu substitui programa Formar+, ne’ebé remata ona iha loron 31 dezembru 2018 no sei ezekuta entre 2019 to’o 2022.

Projetu PRO-Portugés nian ne’e sei realiza durante oras 520 formasaun ba profesór sira maizumenus 4.300 ba kada tinan, karik bele ba prazu tinan tolu nian, ne’ebé profesór hotu-hotu hosi sistema edukativu nasionál nian bele atinje nível B2 ho kapasidade linguístika iha lian portugués to’o finál 2022 nian.

Ba kapasitasaun ne’e, Governu sei prevee orsamentu millaun $14 ba formasaun durante tinan tolu, atu bele aselera formasaun tuir padraun mínimu europa, nune’e profesór sira bele hanorin lian portugués ho di’ak iha sala laran.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here