Frosa Nova Zelándia foto hamutuk ho F-FDTL iha Kuartél Jenerál F-FDTL, Fatuhada, Dili. Imajen/Mídia Defeza

DILI, 27 agostu 2019 (TATOLI)-Komandu FALINTIL-Forsa Defeza Timor-Leste (F-FDTL, sigla portugés) hato’o agradese ba Governu no Forsa Defeza Nova Zelándia ne’ebé kontinua apoia ba dezenvolvimentu forsa defeza Timor-Leste.

Xefe Estadu Maiór F-FDTL Coronel Calisto Santos “COLIATI”. Imajen/Mídia Defeza

Xefe Estadu Maiór F-FDTL Coronel Calisto Santos “COLIATI” hato’o apresiasaun ne’e durante hala’o enkontru anuál nivel bilaterál entre Timor-Leste ho Nova Zelándia, ohin, hodi diskute hamutuk atividade kooperasaun servisu iha área defeza nian.

“Ita agradese, ne’e enkontru bilaterál entre forsa Defeza Timor-Leste no Forsa Defeza Nova Zelándia hodi ko’alia kona-ba kooperasaun saida mak Nova Zelándia bele kontinua ajuda F-FDTL atu   eleva ita nia kapasidade  no profisionalizmu  serve di’ak no garante di’ak ita nia seguransa  iha rai maran no tasi,”  hateten Xefe Estadu Maiór F-FDTL Coronel Calisto, iha ámbitu reuniaun ne’ebé hala’o   iha Kuartél Jenerál F-FDTL Fatuhada, Dili.

Enkontru bilaterál defeza ne’e sai nu’udar espasu ida ba parte rua hodi ko’alia hamutuk atividade parseria entre parte rua ba oin bele kontinua servisu hamutuk nafatin.

Coronel COLIATI hatutan, bainhira Estadu harii Instituisaun Komandu F-FDTL iha tinan 2001, Nova Zelándia fó kedas ona sira nia apoiu barak tebes  too agora iha área espesífiku lojístika oinsá prepara F-FDTL atu bele hatene jere lojístika nian no kapasitasaun rekursu umanus.

“Tinan ba tinan kooperasaun ne’e aumenta, no tinan ne’e Nova Zelándia apoiu F-FDTL iha área seguransa marítima no área ida maka prepara forsa manutensaun dame iha ONU,”  COLIATI hateten.

Iha fatin hanesan, Xefe Ekipa Forsa Defeza Nova Zelándia, Kapitaun de Mar e Guera Shaun Fogarti, dehan, Nova Zelándia kontinua apoiu setór defeza ne’ebé la’o di’ak tebes.

“Depois liu tinan 20,  ha’u haree katak, servisu hamutuk ho Timor-Leste iha progresu di’ak tebes no ita bele haree katak forsa F-FDTL dezenvolve di’ak loos iha kapasidade no kapabilidade atu halo servisu  ne’e hatudu rezultadu ida pozitivu tebes,” hateten Shaun Fogarti.

Iha segunda (26/08/2019), delegasaun  reprezentante Forsa Nova Zelándia, Shaun Forgati, akompaña husi Embaixadór Nova Zelándia mai Timor-Leste, Philip Hewit,  hala’o enkontru ho Ministru Defeza no Ministru Interior Interinu Brigadeiru Jenerál Filomeno da Paixão de Jesus, hodi reinteira kompromisu governu Nova Zelándia nian hodi kontinua fó apoiu mai Timor-Leste.

 Jornalista: Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here