Ministra Finansa en-ezersísiu, Sara Lobo Brites. Imajen/TATOLI.

DILI, 27 agostu 2019 (TATOLI)–Ministra Finansa interina, Sara Lobo Brites, ohin, ba Ajénsia Tatoli iha Palásiu Governu, katak estatutu orgániku autoridade tibutária no aduaneira hetan ona alterasaun, nune’e estende mandatu Komisaun Instaladora hodi halibur fali kuadru pesoál sira.

Konsellu Ministru aprova ona alterasaun dekretu lei númeru 9/2017, 29 marsu, kona-ba estatutu orgániku autoridade aduaneira no dekretu lei númeru 13/2017, 5 abril, kona-ba estatutu orgániku autoridade tributária, atu hafoun fila fali mandatu komisaun instaladora.

“Alterasaun estatutu hosi autoridade rua ne’e atu estende fila fali mandatu komisaun instaladora tanba komisaun nia mandatu hotu ona iha 2017, tanba ne’e altera hodi komisaun bele funsiona hikas hodi halibur no halo desizaun ba kuadru pesoál ne’ebé atu rekruta iha autoridade tributária no aduaneira”, esplika Ministra Finansa interina, Sara Lobo Brites.

Aléinde ne’e mós atu haree sira-nia rezime espesiál no fó formasaun ba funsionáriu sira molok ezerse funsaun hanesan autoridade, nune’e mós fó atribuisaun balun ba parte administrasaun nian, atu sira mós iha autonomia hodi jere sira-nia orsamentu rasik, nune’e sira bele halo servisu di’ak.

Komisaun instaladora ne’e prejide hosi Primeiru-Ministru, Taur Matan Ruak, ne’ebé apoiu hosi Ministériu Finansa, enkuantu membru komisaun instaladora ida maka Prezidente Komisaun Funsaun Públika, Faustino Cardoso no membru tékniku sira.

“Komisaun instaladora prezide hosi Primeiru-Ministru no ajuda hosi Ministériu Finansa, no membru hosi komisaun instaladora ida maka Prezidente Komisaun Funsaun Públika no mós membru tékniku sira”, katak.

Orsamentu ba autoridade rua, durante ne’e mai hosi Ministériu Finansa, maibé ho revizaun estatutu, posibilidade orsamentu sei tau ketak iha 2020, tanba ne’e maka antes ne’e tenke rekruta ona funsionáriu iha área administrasaun, planeamentu no finansa hodi apoia ba sira -nia tempu atu ezekuta orsamentu mesak, maibé agora sei iha faze tranzisaun.

Ministra Finansa interina aprezenta revizaun estatutu orgániku autoridade tributária no aduaneira iha 7 agostu 2019 no hetan aprovasaun iha Konsellu Ministru iha 23 agostu 2019.

Notísia relevante : KM Aprova Ona Dekretu Lei Autoridade Aduaneira no Tributária

Jornalista: Antónia Gusmão

Editora    : Maria Auxiliadora 

HAKEREK NO HATÁN

Please enter your comment!
Please enter your name here