Diretór Jerál Autoridade Aduaneira (AA), José António Fátima Abílio. Imajen/TATOLI.

DILI, 27 agostu 2019,(TATOLI)-Autoridade Aduaneira (AA) ka Alfándega Timor-Leste (TL) no Alfándega Indonézia sei selebra akordu ida iha setembru tinan ne’e ho objetivu atu iha relasaun di’ak liután hodi kontrola atividade ilísitu sira.

Diretór Jerál AA, José António Fátima Abílio, hatete haruka ona karta ofisiál ba Diretór Jerál AA Indonézia para husu konfirmasaun katak sira konkorda ona ezbosu ba alterasaun asinatura ba akordu ne’e

“Kuandu sira konkorda ona, sira fó tiha notifikasaun ofisiál ida mai liu hosi Ministériu Negósiu Estranjeiru, ita bele determina ona data para realiza asinatura. Akordu ne’e sei asina iha fulan-setembru 2019”, Diretór Jerál informa iha Palásiu Governu, ohin.

José António esplika estabelese akordu ne’e para bele fó kontinuidade ba akordu ida ne’ebé Ministra Finansa Timor-Leste ho Indonézia asina iha 4 maiu 2019 kona-ba kooperasaun fronteira terrestre nian para atu fasilita transporte, turizmu, veterinária no pekuária ne’ebé Alfándega automatikamente hanesan parte ida hosi CIQ ne’ebé tenke fasilita prosesu sira.

Akordu ne’ebé atu asina ho Indonézia atu fasilita di’ak no hametin liután kooperasaun Alfándega nasaun rua ne’e hodi haree prosesu sira iha pasa fronteira no haree mós atividade ilísitu sira hanesan komérsiu illegal no droga.

“Ida ne’e maka ami sei konsentra para serbisu hamutuk di’ak liután hodi minimiza risku sira ne’e. Agora, informalmente kooperasaun liuhosi komunikasaun nafatin entre intelijénsia Alfándega Indonézia ho Timór-Leste nian ba iha prosesu troka informasaun, dadus. Tantu rekizita hosi sira-nia parte no husi Timor-Leste nian fó informasaun ba malu para ajuda halo kontrolu iha fronteira ida-idak ninian”.

Iha asinatura ne’e sei kobre hotu iha fronteira sira inklui mós portu sira, tanba bainhira konkorda ona ho Bea Cukai (Alfándega) Indonézia automatikamente área fronteirisa sira sei kobre, inklui portu.

“Ita-nia ekipamentu mak limitadu tebes, ita iha x-ray maibé ne’e la’ós própriu para atu deteta ba droga sira. Ne’ebé presiza atu investe tan, klaru Governu tenke aloka osan, maibé kona-ba sasán sira x-ray sufisiente atu deteta”, katak nia.

Foin lalais ne’e, Governu liuhusi reuniaun Konsellu Ministru aprova proposta deliberasaun kona-ba akordu kooperasaun (MoU-sigla inglés) Alfandegária entre Timor-Leste ho Repúblika Indonézia ne’ebé aprezenta hosi Ministra Finansas ein-funsaun, Sara Lobo Brites, hodi bele presta kooperasaun entre TL-RI oinsá haforsa malu no transforma koñesimentu ba malu iha area servisu alfándega nian.

Ministru Estadu Prezidénsia Konsellu Ministru, Hermenegildo Augusto Cabral Pereira, relata katak MoU ida ne’e atu promove kooperasaun entre nasaun rua ne’e hodi troka informasaun no fahe koñesimentu ba luta efetiva kontra krime, espesiál ba krime transnational no tráfiku ba sasán ilísitu sira.

“Ministériu Finansas sei asina ho nia omólogu Ministériu Finansa Indonézia nian iha ámbitu komersiál, fasilitasaun, atividade ekonómika ne’ebé mak KM aprova ona MoU ne’e”, informa Ministru Agio Pereira liuhosi konferénsia imprensa, foin lalais ne’e.

Nia hatutan, MoU ne’e mós prevee komponente hosi dezenvolvimentu institusionál ba atividade edukasaun no formasaun. KM fó podér tomak ba Diretór Jerál Autoridade Aduaneira, José António Fatima Abílio atu realiza asinatura ba memorandu nee.

Iha biban hanesan Ministra Finansa, Sara Lobo Brites, hatete KM fó plenu podér ba Alfándega hodi asina akordu ida ho Alfándega Indonesia, kona-ba troka informasaun no mós apoiu formasaun ba Alfándega TL no Indonesia hodi fó apoiu ba malu.

Notísia relevante : TL-RI ho ADB Asina Akordu Fronteirisu iha Fiji

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here