PM Taur Matan Ruak ho Espoza, hato'o sentidu condolencia ba família matebian Santina Amaral Fernandes, segunda (26/08/2019). Imajen/Mídia GPM

DILI, 26 agostu 2019 (TATOLI)-Primeiru-Ministru, Taur Matan Ruak, ohin, hato’o sentidu kondolénsia ba família matebian  Santina Amaral Fernandes, espoza husi Sekretáriu Estadu Ambiente  (SEA), Demétrio do Amaral de Carvalho, iha uma matebian, Caicoli, Dili.

Notísia Relevante : Saudoza Santina, Motivadora iha RENETIL

PM Taur Matan Ruak, hato’o sentidu condolencia ba família matebian Santina Amaral Fernandes. Imajen/Mídia GPM

Xefe Governu, Taur Matan Ruak akompaña husi Espoza, Isabel Ferreira, Ministru Agrikultura no Peska (MAP), Joaquim José Gusmão dos Reis Martins,  Ministru Ensinu Superior, Siénsia no Kultura (MESSK), Longuinhos dos Santos, Vise Ministra Solidariedade Sosiál no Inkluzaun (MSSI), Signi Chandrawati Verdial ho membru Governu sira seluk to’o iha mate uma tuku 11:00 Otl hodi presta sentidu kondolénsias ba espoza membru Governu ba da-ualu ne’e.

Matebian hakotu iis iha Ospitál Nasionál Guido Valadares (HNGV-Sigla Portugés) iha loron 24 agostu 2019 hafoin baixa iha ICU durante loron 66.

Iha tuku 2:30 Otl kontinua lori mate isin ba iha sede organizasaun Naun Governmental (ONG) FOKUPERS  no kontinua ba RENETIL hodi fó  omenajen ikus. Depois kontinua ho misa requiem iha Igreja Balidi no funeral ikus iha semitériu Xina Rate Taibesi Dili.

Santina Amaral Fernandes ho naran susun Onawai, moris iha Uato-Carbau Munisípiu Viqueque iha loron 23 Fevereiru 1968, oan feto mesak husi Kazál Gregorio Amaral (Matebian) no Ana Fernandes, husi lisan Boromori ho Balabasiba, Liasidi Kaimaria.

Matebian hahú ninia estudu iha eskola ensinu báziku Uato-Carbau husi tinan 1974-1976. Depois iha 1979-1983 kontinua estudu iha eskola ensinu báziku Bemori Munisípiu Dili iha tinan 1979-1983 hodi konklui prosesu aprendizajen nivél báziku.

Hosi tinan 1983 – 1985, matebian kontinua estuda iha eskola pre-sekundáriu (SMP-sigla Indonézia), Paulo IV no remata eskola sekundáriu Públiku Númeru 1 Becora  Dili husi tinan 1987 -1989.

Iha tinan 1995 matebian remata estudu nivel Diploma III iha área akademia Turizmu (Pariwisata) Jogjakarta Indonézia  hafoin hetan bolsu estudu iha momentu ne’ebá.

Durante hala’o estudu iha Indonézia, matebian ho ninia kaben Demétrio do Amaral de Carvalho, partisipa ativu iha movimentu estudantíl ba ukun rasik aan liuhusi organizasaun RENETIL. Liuliu partisipa iha asaun demonstrasaun 12 Juñu Departamentu Externa Jakarta iha 1998.

Matebian mós hola parte nudár distribuidora prinsipál ba Jornál TALITAKUM  Timor  bainhira RENETIL lansa publikasaun Jornál TALITAKUM bainhira Timor-Leste sei hola parte   iha Indonézia  hanesan  Provínsia ba 27 .

Espoza husi Sekretáriu Estadu Ambiente hahú ninia karreira hodi servisu iha organizasaun FOKUPERS  to’o tinan  2010 hanesan Koordenadora asisténsia ba vítima no  iha 2011-2012 ativu iha programa ita nia rai’ Ministériu Justisa depois asume kna’ar nu’udar Koordenadora Rede ba Rai to’o 2014.

Iha vida Polítika, matebian apoia ninia kaben hodi partisipa iha atividade organizasaun polítiku sira iha Partidu Demokrátiku no ikus iha Partidu Libertasaun Populár (PLP)

Matebian, Santina Amaral Fernandes, kaben ho Demétrio do Amaral de Carvalho, iha tinan 1995 ho oan na’in haat;  oan da-uluk maka Gabriel Amaral Fernandes  iha tinan 1995 (matebian). Oan da-ruak, Dezideiro Amaral Fernandes  (1997); oan terseiru maka  Hularema Amaral de Carvalho (2002) no ikun, Grigorio Lealrema 2015.

Jornalista  : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here