iklan

INTERNASIONÁL, HEADLINE

Presiza Haree Kontribuisaun Ofisiál ONU ba Kestaun TL

Presiza Haree Kontribuisaun Ofisiál ONU ba Kestaun TL

Reprezentante Espesiál Sekretáriu Jerál ONU, Ian Martin, soru-mutuk ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, ohin. Imajen Mídia PR

DILI, 26 agostu 2019 (TATOLI)—Reprezentante Organizasaun Nasaun Unida (ONU), Ian Martin, hala’o soru-mutuk ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Iha soru-mutuk ne’e, Ian Martin hateten presiza haree mós kontribuisaun hosi ofisiál ONU sira ne’ebé tau-matan ba kestaun Timor-Leste (TL) antes estabelesimentu United Nations Mission in East Timor (UNAMET) ne’ebé halo tiha ona ninian serbisu ba Timor-Leste durante dekáda.

Nia esplika, misaun UNAMET nu’udar kontinuasaun serbisu ne’ebé ONU hala’o tiha ona antes, hanesan Francesc Vendell no Tamrat Samuel.

Ian Martin informa, Misaun ONU iha Timor-Leste la’o susesu tanba fó biban ba Timoroan atu ezerse nia direitu ba autodeterminasaun iha 30 agostu 1999. Iha Sahara Osidentál, nia haktuir, maski iha Rezolusaun ONU atu hala’o referendum iha 1991 maibé to’o ohin loron laiha ninia implementasaun.

Ian Martin nu’udar Reprezentante Espesiál Sekretáriu Jerál ONU Koffi Annan ne’ebé lidera UNAMET iha 1999 hodi organiza no hala’o referendum iha Timor-Leste.

Entretantu, ba Ian Martin, Prezidente Repúblika, Francisco Guterres Lú Olo, haklaken loron 30 agostu nu’udar loron istóriku ba Timor-Leste, tanba ne’e presiza kaer ba istória hodi kontinua hateke ba oin. Nu’udar nasaun independente, Timor-Leste atinje buat barak ona, maibé hosi parte seluk Prezidente Repúblika preokupa ho dezigualdade ne’ebé aumenta, ki’ak no dezempregu ne’ebé sei aas hafoin tinan-20 Referendum.

Jornalista: Cipriano Colo

Editór: Xisto Freitas

iklan
iklan

Leave a Reply

iklan
error: Content is protected !!