Eis Sekretáriu Estadu Juventude no Desportu (SEJD) VI Governu Konstitusionál, Leovigildo da Costa Hornai. Imajen Tatoli/Hortençio Sanchez

DILI, 26 agostu 2019 (TATOLI)—Eis Sekretáriu Estadu Juventude no Desportu (SEJD) VI Governu Konstitusionál, Leovigildo da Costa Hornai, hateten atu transforma Liga Futeból Amadora (LFA) ba semi profisionál presiza serbisu triparte la’o di’ak.

“Ita ko’alia kona-ba futeból iha parte tolu tenke serbisu hamutuk di’ak, hanesan Governu, Federasaun Futeból Timor-Leste (FFTL) no emprezáriu sira tantu timoroan ka estranjeiru hodi investe maka’as hafoin bele hakat ba faze semi profisionál nian,” tenik Leovigildo ba Agência Tatoli iha Dili, foin lalais ne’e.

Nia esplika, FFTL nia serbisu mak tenke halo aprosimasaun no prepara kondisaun tuir regra no prosedimentu sira ne’ebé Asian Football Confederation (AFC) oferese.

“Federasaun mós tenke serbisu hamutuk ho Liga Futeból Amadora nune’e bele hatama prosesu sira ne’ebé mak AFC husu. Governu ho emprezáriu sira tenke iha ona hanoin oinsá atu investe didi’ak asuntu futeból ne’e rasik,” nia esplika.

Tanba ne’e, nia husu ba Governu tenke hola pozisaun pro-ativu liu iha konfiansa hirak ne’ebé investór nasionál sira fó nune’e bele halo investimentu.

“Agora ita haree, emprezáriu nasioná no internasionál barak mak investe ona iha klube. Di’ak ka ladi’ak ita haree klube sira la’o ho kondisaun ne’ebé mínimu ho preparasaun ne’ebé mak iha. Ba oin ne’e mak tenke organiza di’ak liu-tan atu investór sira bele hakbesik liu-tan ba iha ita-nia liga nasionál,” dehan eis prezidente CNJTL ne’e.

Nia hatutan, estatutu ne’ebé hatuur iha LFA mak hanesan foin amadora ho razaun tanba foin hahú no infraestrutura barak mak sei falta.

“Maibé, tinan lima ka sanulu mai ita bele haree ona ita-nia liga ne’e ba profisionál. Maibé, klube sira mak ita tenke halo kapasitasaun didi’ak. Subsídiu ne’ebé mak iha oferese nafatin ba sira atu nune’e sira-nia finansa bele forte para bele iha akreditasaun lalais. Razaun ida mós mak ne’e, ita labele hamosu klube foun tan. Mantein nafatin klube tuan sira maski sira nia finanseiru menus ka problema internu barak mós estadu tenke preokupa ona. Nune’e mak ha’u dehan, triparte ne’e tenke tuur hamutuk ona hodi diskute oinsá haree ba oin atu suporta liga ne’e sa’e ba semi profisionál ka lae,” nia subliña.

Fó hanoin hikas katak dezde Timor-Leste ukun-aan, foin mak harii Liga ne’ebé ho nível amadora ne’ebé hanaran Liga Futeból Amadora iha 2015, iha ne’ebé liga refere hetan apoiu finansiamentu pursentu 100 hosi Governu no pursentu 10 hosi patrosinadór.

LFA hahú ho klube rua nunlu resin rua—fahe ba parte rua hanesan Primeira Divizaun no Segunda Divizaun. Primeira Divizaun hamutuk klube ualu no Segunda Divizaun klube rua-nulu resin rua.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here