Saudozu Liura Veríssimo iha kampaña CNRT 1999

DILI, 26 agostu 2019 (TATOLI)-Familia Saudozu Liurai Veríssimo Dis Qunitas, hato’o kongratulasaun ba Estadu tanba bele selebra loron konsulta populár no misaun INTERFET depois tinan 20 Timor-Leste restaura nia ukun rasik-aan.

Sergio Dias Qunitas ho familia Saudozu Liura Veríssimo halo konferensia imprensa iha Dili, Sábadu (24/08/2019). Imajen/Domingos Piedade Freitas

Saudozu Liurai Veríssimo Dias Quintas oho husi grupu milisia Tim Alfa iha loron 27 agostu 1999 tanba de’it nia oferese nia rezidénsia rasik hodi halo sekretariadu ka sede ba Concelho Nacional Resistencia Timorense (CNRT).

La’ós oho de’it Liurai Veríssimo, maibé milisia pro-autonomia sira sunu motuk hotu saudozu nia uma to’o feen ho oan sira la aproveita sasán tanba asaun brutalismu ne’e rezulta uma tetu tiha hanesan ho rai.

Liuhusi konferénsia imprensa, Sábadu (24/08/2019), Sergio Dias Qunitas nu’udar oan mane husi Saudozu Veríssimo, husu ba estadu Timor-Leste konsidera terus na’in sira.

Nia dehan, faluk no oan ki’ak sira la ezije atu hadi’a hikas uma no la ezije rekompensasaun, maibé hakarak agradese ba Estadu bele selebra loron istóriku ne’e hodi relembra memória pasadu, antes no depois loron konsulta populár, 30 agostu 1999.

 “Ami hakarak manifesta, ami nia kongratula ba estadu Timor-Leste tanba komemora tinan 20 konsulta populár,” hateten Sergio Dias Qunitas lori família, faluk no oan kiak sira nia naran.

Sergio Dias Quintas hateten, tinan 20 liu ba situasaun difisil tebes. Ema barak mate no lakon sira nia riku soin. Tanba ne’e, merese duni atu selebra hodi sai hanesan lisaun no istória ba jerasaun foun sira atu hanoin hikas no halo reflesaun.

Iha altura ne’ebá família hotu sente katak, trajédia asasinatu ne’e extrenamente nakonu ho terror ne’ebé terrivel hodi hamosu tristeza no tinan 20, komemorasaun loron konsulta popular ne’e atu relembra memória pasadu hodi jerasaun foun koñese istóriku rai ida ne’e nia para hodi hadi’a Timor Leste ba oin.

“Ha’u hanesan Saudozu Liurai Veríssimo Dias Quintas nia oan mane ne’ebé hola parte iha kampaña CNRT 1999, iha altura sente katak, trajédia asasinatu ne’e extrenamente nakonu ho terror hodi hamosu tristeza. Tinan 20 liu ona komemorasaun loron konsulta populár ne’e atu relembra memória pasadu hodi jerasaun foun koñese istóriku rai ida ne’e nia para hodi hadi’a Timor-Leste ba oin,” hateten Sergio Dias Quintas.

“Ita hotu hatene katak depois ita ukun aan saudozu nia rezidénsia rasik no sasán antigu sira ahi han motuk depois saudozu nia faluk ezije ba ita nia ukun na’in sira promote atu hadi’a uma ne’e mais to’o agora la iha posibilidade atu hadi’a,” hateten Sergio Dis Quintas.

Nu’udar família husu ba ukun na’in sira, se bele karik tau matan ba terus na’in sira inklui mós faluk. Tanba ohin loron rezidénsia ne’ebé mak oferese ba sede CNRT to’o agora estadu la tau matan. Nia na’in rasik mak harii mais la iha kbiit, no governu fó tiha ona rekoñesimentu ba faluk maibé osan ne’ebé mak nia simu la too, osan ne’e atu sustenta de’it ba nia moris .

Parte família hato’o ona proposta ba ministériu relevante atu haree posibilidade para bele ajuda ka hadi’a rezidénsia refere tanba rezidénsia ne’e kondisaun la dun di’ak nune’e husu ba estadu se bele karik tau matan rezidénsia.

Iha fatin  hanesan Victor da Costa nu’udar sasin konta tuir katak, iha momentu ne’ebá ba sasin hanesan Komisi Perdamaian dan Stabilitas (KPS) hodi buka fatin atu loke sekretáriu ka sede CNRT ida iha parte Ponta Leste  (Lospalos) nune’e halo kontaktu ho UNAMET loron-loron.

Sasin ne’e konta katak, iha tinan 1999 iha nesesidade UNAMET mak organiza entaun  tenke iha sede permanente ida UNAMET bele kontaktu loron-loron ho kuadru CNRT nasionál iha Dili, Mauhunu, Leandro Isac, Manuel Carrascalão, (matebian) e sira balun mate ona, sira deside ha’u  atu ba loke sede iha ne’ebá nu’udar inisiativa primeiru ida para munisipiu (Kabupaten) sira seluk bele halo tuir.

“Iha momentu ne’e ha’u  ba iha ne’ebá ha’u la hanoin atu loke sede CNRT iha saudozu Veríssimo nia uma, mais ami família loron-loron ha’u ba hemu kafé iha ne’ebá, nia (saudozu) husu dehan imi hala’o saida! Ha’u dehan ami atu mai loke CNRT, ami hetan ona fatin ida iha ne’ebá atu mai loke sede, mais nia (saudozu) dehan katak haaa! Imi ba lakon tempu mai loke iha ita nia uma, ita nia uma mak ne’e,” Vitor da Costa hateten.

Saudozu mós partisipa iha kampaña, nia hanesan ne’ebé reprezenta jerasaun tuan, ko’alia iha kampaña. Ho nune’e mak halo tropa Indonézia hirus hodi fó kbiit ba milisia tim Alfa mai halo atake ba nia no oho nia.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here