DILI, 25 agostu 2019 (TATOLI)—Ekipa Makikit Laulara alias AD SLB halakon armada Ponta Leste ho golu mihis (1-0) ne’ebé prodúz hosi jogadór, Tomás Sarmento (26) iha minutu 7 iha jogu kontinusaun Primeira Divizaun Liga Futeból Amadora (LFA) époka 2019 ne’ebé hala’o iha Estádiu Munisipál Dili, domingu ne’e.

Vitória ne’ebé SLB gaña halo Ponta Leste susar duni tuir Lalenok United FC tanba Lalenok nia viajen hakat dook ona (valór 22 iha tabela klasifikasaun provizória) hosi ekipa sira hotu ne’ebé hamahan aan iha Primeira Divizaun LFA maski sei hela jornada 4.

Jogu refere dirije hosi árbitru Eufrásio da Silva, juiz liña Romario Malitety, Juviano Reis no árbitru rezerva, Francisco Fátima.

Manán de’it ho golu ida, treinadór SLB Kim Shim, hateten nia sente kontente maibé jogu la’o ho fallansu barak nune’e nia husu ba LFA atu haree liliu árbitru sira tenke hadi’a para bele lori futeból iha Timor-Leste ba oin.

“Sente kontente, maibé ha’u sei esforsu nafatin atu hadi’a di’ak liu-tan iha futuru. Árbitru sira mak tenke hadi’a nafatin tanba ohin sira iha fallansu barak,” dehan Kim.

Nia hatutan, SLB nia prestasaun tuun tanba durante ne’e nia lori hela Selesaun Nasionál U-15 ba joga hela iha li’ur tanba ne’e jogadór sira treinu mesak ladún hatudu prestasaun ne’ebé di’ak.

“Ha’u hamutuk ona ho sira ami sei la’o ba oin. Durante ne’e, ha’u lori tiha sira U-15 ba li’ur entaun jogadór sira treinu mesak de’it. Timoroan barak joga di’ak maibé presiza kampu no fasilidade di’ak,” nia subliña.

Iha sorin seluk, treindór Ponta Leste, Eduardo Pereira haklaken katak lakon no manán ne’e normál tanba ne’e mak futeból.

“Lakon manán ne’e normál. Ida ne’e mak futeból. Maibé, ami la satisfas ho árbitru nia desizaun. Loloos, ohin jogadór SLB nian monu iha kampu laran nakduir ona ba li’ur jogu la’o normál nafatin, maibé nusa mak jogadór ne’e duir tama fali mai laran árbitru hú hodi hapara jogu derepente. Ne’e la loos. Sira labele halo bebeik nune’e,” nia lamenta.

Entretantu, jogu kontinuasaun LFA ne’ebé hala’o loron hanesan iha Estádiu Malibaca Maliana, ekipa Boavista FC Timor impata ho Académica FC 2-2.

Golu Boavista marka hosi jogadór Henrique Martins iha minutu 4, António Alcantara 45+1. Enkuantu, golu Académica hatama hosi Juvenal Boavida iha minutu 31, Celcio Escurial 81.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here