DILI, 24 agostu 2019 (TATOLI)—Jogu kontinuasaun Primeira Divizaun Liga Futeból Amadora (LFA) époka 2019 jornada 10 ne’ebé hala’o iha Estádiu Munisipál Dili, ohin loraik, Assalam FC liki (vense) Atlético Ultramar 5-1.

Hosi rezultadu ne’e, jogadór prinsipál Assalam FC ho nasionalidade Gana, Daniel Adadi (10), sai eroi tanba konsege marka golu tolu (hatric).

Hosi derrota ne’ebé Ultramar hetan, lori ekipa ne’e mantein iha zona dezpromosaun hamutuk ho Académica FC. Enkuantu, Assalam tuur hakmatek iha zona seguru.

Golu vitória Assalam prodúz hosi jogadór Daniel Adadi iha minutu 2, 70, 83, Franciatma Kefi (21) 37, 57 no golu unikú Ultramar nian marka hosi Jorge Godinho iha minutu ’90.

Jogu refere dirije hosi árbitru Jaime Gonçalves, juiz liña Romário Maliteti, Gerónimo dos Santos no árbitru rezerva, Cristóvão Alves.

Fó hanoin mós katak jogu jornada 10 ne’ebé hala’o iha Estádiu Malibaca Maliana iha loron hanesan (ohin), Lalenok United FC vense Karketu Dili FC ho golu 2-1.

Golu Lalenok nian hatama hosi jogadór Fábio Cotinho (25) iha minutu 30, 61 no golu Karketu marka hosi Gelvanio Alberto (10) 81.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here