Vigáriu Parókia Nossa Senhora do Rosario de Oé-Cusse, Pe. Cirilo dos Santos. Imajen Tatoli/Cipriano Colo

OÉ-CUSSE, 24 agostu 2019 (TATOLI)—Vigáriu Parókia Nossa Senhora do Rosario de Oé-Cusse, Pe. Cirilo dos Santos sente triste tanba povu Atoni la partisipa durante komemorasaun Tinan 20 Konsulta Populár no prezensa misaun INTERFET iha Timor-Leste.

Iha Padre nia observasaun haree katak durante serimónia komemorasaun iha Rejiaun Administrativa Espesiál Oé-Cusse Ambenu (RAEOA),  povu Atoni la partisipa. Nia dehan, iha ema ida rua de’it mak partisipa, liliu ema sira ne’ebé besik liu autoridade sira.

“Tuir loloos festa ne’e povu nian, maibé realidade hatudu katak povu la sente no la partisipa”,  nia hateten.

Nia haktuir, dezde programa iha loron primeiru, ema laiha, to’o ohin misa agradesimentu mós ema la partisipa. Sorte di’ak estudante sira hosi eskola Santo António partisipa, se lae Igreja mamuk.

“Ida ne’e triste boot”, hateten nia ho triste iha rezidénsia Numbei, ohin. Amu ne’e konsidera katak Autoridade sira hanesan mós komisaun organizadora laiha koordenasaun di’ak ho povu Atoni no la divulga informasaun ba povu.

Hosi sorin seluk,  Amu observa katak  situasaun ne’e akontese tanba konflitu partidarizmu iha Oé-Cusse buras iha Oé-Cusse ikus mai hafahe povu.

“Ita lalika taka realidade ne’e.  Oé-Cusse partidarizmu buras. Ha’u mak ukun haree mak ha’u nia koor de’it”, nia salienta.

Tanba ne’e,  amu sujere atu iha rekonsiliasaun polítika iha Oé-Cusse,  atu sobu tiha tradisaun aat ne’ebé muda tiha povu ida ne’ebé tuir loloos edukadu, pasiénsia no obediénsia na’in inklui fiar na’in.

Nia informa katak igreja ninia koordenasaun ho autoridade no povu durante ne’e di’ak tebes, tanba igreja ho nia prinsípiu fundamentál atu halibur povu Maromak nia moris iha unidade no armónia—la haree ba koor, feto ka mane, labarik ka katuas.

Amu rekoñese katak maski dezenvolvimentu suku rua de’it iha Oé-Cusse, maibé bainhira povu kontinua moris iha presaun, dezenvolvimentu laiha valór.

Antes ne’e, iha loron primeiru, hafoin  Marça de Amor, Prezidente Autoridade interinu, Arsénio Paixão Bano hateten  autoridade koordena ho parte hotu mak realiza atividade ne’e. Kuaze fulan tomak Autoridade divulga informasaun liuhusi meiu oioin hanesan hakerek karta, avizu liuhusi  mídia sosiál no seluk-tan.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here