Prezidente Autoridade Interinu Arsénio Bano, eis Primeiru-Ministru, Marí Bim Amude Alkatiri no Sekretáriu Rejionál sira hamutuk ho estudante sira ba kari aifunan iha tasi ibun Oebau, hodi hanoin hikas matebian sira ne’ebé mate iha tinan 1999 tanba kauza independénsia. Imajen Tatoli/Cipriano Colo

OÉ-CUSSE, 24 Agostu 2019 (TATOLI)—Komemorasaun Tinan 20 Konsulta Populár no misaun INTERFET ba loron daruak iha Rejiaun Administrativa Espesiál Oé-Cusse Ambeno (RAEOA), hahú ho misa agradesimentu iha Igreja Nossa Senhora do Rosário de Oé-Cusse.

Misa agradesimentu ne’e prezide hosi Pároku Parókia Nossa Senhora do Rosário de Oé-Cusse, Pe. Albino Márques, ho ko-selebrante, Pe. Cirilo dos Santos.

Iha omília, Amu Albino husu povu Timor-Leste (TL) liliu povu Oé-Cusse atu Agradese ba Maromak tanba Maromak hadomi povu ne’e.

Nia husu tanba ho Maromak Nia domin mak ohin loron Timor-Leste bele moris iha ukun-aan, liberdade no lahó presaun.

“Importante mak povu tenke agradese tanba Maromak hadomi ita hanesan Jesus hateten iha Evanjellu São João nian dehan katak imi tenke hadomi malu nu’udar ha’u hadomi imi”, Amu haktuir  Jesus nia lia-menon.

Padre fó hanoin katak istória Timor nakonu ho terus, sakrifísiu,  fakar ran no mate, ida ne’e hotu  tanba povu hakarak moris hakmatek.

Nia hatutan, asuwa’in Timor nian, durante ne’e luta ho neon no laran, iha de’it mak intensaun atu lori povu ida ne’e sai hosi terus oioin.

“Ohin komemora ona loron importante Konsulta Populár ba dala 20, tai ne’e presiza ema hotu atu serbisu hamutuk no tenke agradese ba Maromak.

Padre mós husu ba povu no ukun na’in sira atu serbisu hamutuk, fó liman ba malu, hadomi malu atu bele moris hakmatek.

Nia husu mós ba seguransa sira  atu mantein lei no órden, asegura povu no povu presiza kolabora ho seguransa nune’e  evita violénsia oioin iha komunidade nia leet.

Durante misa, intensaun  Padre selebrante reza ba povu TL liliu povu Oé-Cusse atu kontinua moris iha domin nia laran.

Partisipa iha misa agradesimentu ne’e mak hanesan Prezidente autoridade RAEOA interinu, Arsénio Paixão Bano, Sekretáriu Rejionál sira ho estudante hosi eskola Katólika Santo António Oé-Cusse.

Hafoin misa, Prezidente Autoridade Interinu Arsénio Bano, eis Primeiru-Ministru, Marí Bim Amude Alkatiri no Sekretáriu Rejionál sira hamutuk ho estudante sira ba kari aifunan iha tasi ibun Oebau, hodi hanoin hikas matebian sira ne’ebé mate iha tinan 1999 tanba kauza independénsia.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here