Produtu lokál sira iha merkadu Taibesi. Imajen/ Google

DILI 23 agostu 2019, (TATOLI)-Diretora Nasionál Emprendimentu Atividade Produtu Turístiku Ministériu Turizmu, Komérsiu no Indústria (MTKI), Ernestina Lopes, hatete Timor-Leste tenke hatudu nia identidade nu’udar nasaun ida liuhusi ai-han lokál.

“Ai-han ne’ebé ita-nia bei ala sira, no funu-na’in sira konsumu hodi liberta ita-nia nasaun ne’e, ita tenke valoriza liuhosi produtu lokál ne’ebé iha”, Ernestina Lopes afirma iha Sentru Konvensaun Dili (CCD-sigla portugés) bainhira realiza konferénsia imprensa kona-ba feira gastronomia, ohin.

Feira gastronomia importante tebes, tanba iha turizmu la’ós atu promove ka prezerva de’it tasi ho foho ne’ebé furak, maibé importante mós tenke prezerva identidade nasaun nian liuhosi ai-lokál.

“Ita ko’alia turizmu kuandu turista mai, nia sei la direta bá tasi, más sei buka uluk fatin ida hodi han, tanba ne’e ita tenke hatudu ita-nia identidade nu’udar nasaun ida liuhosi ita-nia ai-han”.

Atu valoriza produtu lokál ne’e, Diretora Nasionál Emprendimentu Atividade Produtu Turístiku, ne’e husu ba restaurante na’in no te’in-na’in sira tenke hamosu inovasaun foun, kriatividade foun liuhosi kompetisaun hodi hetan menu foun hodi tau iha restaurante sira hodi promove ita-nia identidade liuhosi gastronomia hodi atrai turista lokál no internasionál.

Aleinde ne’e nia husu tan ba te’in-na’in sira labele loroloron te’in de’it nasi kuning, sate, maibé tenke promove produtu lokál, no kuandu hothotu uza produtu lokál maka povu agrikultór mós aumenta ninia produsaun.

Notísia relevante : Feira Gastronomia ba Komemorasaun Konsulta Populár Sei Realiza Mós Kompetisaun Te’in

Jornalista :  Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here