Hakerek na'in, Carinton Salazar Gonzaga Freitas

Tatoli Ba Ministériu Saúde, Justisa, ESTATAL Ho Órgaun Relijiozu Sira

Hakbiit Inan-Aman Forte Iha Nasaun Ida-Ne’ebé Forte

Reflesaun Iha Ámbitu Komemorasaun Loron 30 Agostu 2019

Hosi: Carinton Salazar Gonzaga Freitas

  1. Prefásiu

Eransa kolonializmu husik hela istória malahuk, naruk no nakonu ho tristeza ho sofrimentu. “Ohin amigu aban sai inimigu. Ohin inimigu aban sai fali amigu.” Kultura ida ne’e eziste iha aspetu hotu-hotu tantu iha aspetu sosiál no iha setór morál sira nu’udar umana.

Istória naruk Timor-Leste nian, la sees hosi liafuan “FUNU” no funu ne’e rasik rezulta buat barak sai hanesan alvu ba destruisaun sira. Tinan barak povu Timor-Leste enfrenta krize oin-oin.

Haksumik hosi krize ida, hakat fali ba krize seluk. Sékulu moris iha Timor-Leste iha okupasaun nian terus tebes. Ema barak mate, lakon ninia riku no soi, fahe malu. Asuwa’in barak saran sira-nia vida, sira-nia ruin ho raan lekar namkari lemorai ba rai doben ida ne’e.

Inan feto barak moris faluk, oan ki’ak barak lakon sira-nia inan, lakon sira-nia aman, Inan feto barak mós sai vítima ba esploitasaun seksuál, maun alin oho malu no problema sosiál oin-oin. Hakarak hakilar karik, hakilar ba se? konsekuénsia hosi liafuan “FUNU” ne’e mak karik nune’e ona.

Dezvia tiha hirak leten ne’e atan ha’u orgullu nu’udar timoroan. Hahú hosi Don Boaventura iha tinan 1912 iha funu Alas-Manufahi, kontra okupasaun portugés.

Iha tinan 1975 timoroan lubuk ba lubuk hamutuk kontra okupasaun Indonesia bele dehan timoroan sira, iha ona sira-nia sentidu nasionalizmu ho patriotizmu ne’ebé boot ba rai doben ida ne’e. “MATE KA MORIS UKUN RASIK ÁN”

Entuziazmu povu Timor-Leste nian ba ukun aan iha 30 Agostu 1999. Iha tinan rua nulu (20) liubá. Atu kore án hosi korrente invazór, pozitivu tebes. Povu tomak, hosi loro sa’e to’o loro monu, tasi feto to’o tasi mane, Oecusse to’o Jaco. Hotu-hotu iha fileira ida, rejeita OTONOMIA aseita INDEPENDENSIA.

Timor-Timur (dalen indonézia) nakfilak hikas ba Timor-Leste (tetungés ou tetun portugés). Ne’ebé antes ne’e, provínsia ba dala rua nulu resin hitu (27) hosi Negara Kesatuan Republik Indonesia (NKRI).

Durante dékada rua resin, tinan rua nulu resin haat (24). Povu Timor-Leste, moris iha ditadura liman besi, Rejime Soeharto nia ukun.

04 Setembru 1999 hafoin referendu liu tiha loron lima (05). Maizumenus tuku sanulu (10) dadersan Otl. Nasoins Unidas (NU) abertamente fó sai rezultadu kontajen votu iha Nova Iorke, no hatudu katak maioria povu Timor-Leste hili rejeita autonomia ho porsentu % 78,50 no Autonomia hela ho % 21,50.

Iha loron ne’e Independénsia hahú. Bainhira fihir hosi ha’u nia ókulu. Tanba Indonézia atu halo rahun Timor-Leste, fahe tiha ba atus ba atus mós independénsia ona.

No Timor-Leste mós rejistu ona, iha lista naruk NU nian, Timor-Leste nu’udar nasaun dala atus ida sia nulu resin ida (191) NKRI de’it sei la bele muda satán milisia gabasola ho rakitan hehe.

Hafoin ida ne’e, iha 20 Maiu 2002. Timor-Leste mós restaura ninia independénsia iha oras 00.00 Otl kalan. Ne’ebé hetan sasin direta hosi Sekretáriu Jerál Nasoins Unidas nian altura ne’ebé saudozu Kofi Annan.

2019 Ohin Timor-Leste mós restaura ninia independénsia ba tinan 17 ona. Demokrasia ho independénsia ne’ebé eziste iha Timor-Leste hetan evolusaun hosi tempu ba tempu iha repúblika ida-ne’e, loron ba loron kontinua muda án.

Koinside ho labarik foin moris karik agora boot ona se kompara ho inan feto sira karik, agora haree ona ninia siklu menstruasaun. Ema karik ema duni ona, feto karik mós feto duni ona.

Iha komemorasaun ba tinan 20 UNAMET mai iha Timor-Leste inklui loron istóriku referendu 30 Agostu hakerek na’in hakarak harame hikas ho hanoin simples balun. Hakarak hakbiit inan-aman foun sira ou sira ne’ebé foin harii uma kain. Liuhosi sikun parte relevante sira-nian.

B. HAKBIIT UMA KAIN FOUN FORTE IHA NASAUN IDA-NE’EBÉ FORTE

Matenek sira hosi postu dekonstrusaun modernizadu dehan mundu agora dook hosi Pensamentu kognitivu maibé hanesan ema Timor ita orgullu tanba ita seidauk lakon ita-nia identidade orijinál.

Iha ita-nia sosiedade sei eziste nafatin aspetu Matrilineal no Patrilineal no hakbiit liután ho fetosá ka umane hafolin ou barlake. Ida ne’e mak matenek na’in sira hosi postu dekonstrusaun modernizadu haluha liu-liu iha Timor-Leste.

Uma kain iha definisaun rua ida mak família orijen ka família konjugál (conjugal family) ne’ebé entre lain, feen ho oan sira ne’ebé iha relasaun interdependénsia.

Seluk mak família konsanguínea (Consanguine Family) ne’ebé mós bele mai hosi sobriñu, tia, avó hosi parte seluk, ne’ebé sei iha relasaun ho raan nian ne’ebé hela hamutuk iha fatin ida.

Família dook mai hela hamutuk bele mós dehan extended family ka família extende (Narwoko ho Suyanto,2004,p.14).

Haree hosi sikun ho lidun barak Iha ita-nia sosiedade liu-liu iha Timor-Leste. Aman sira dalawa’in haluha oinsá, serve ninia família (parseiru) ho razaun oioin. Haluha katak uma kain ida bele la’o tanba iha ema na’in rua (feen ho la’en) iha kometimentu no objetivu atu alkansa ba futuru nian mak foin moris hamutuk.

Aman balun laiha interese hatene kona-ba feen/inan nia kondisaun tanba hotu-hotu dehan ne’e feto nia servisu ou balun dehan servisu barak presiza deskansa entaun husik hela inan ka feen nu’udar pilar importante ba haree uma laran liu-liu (kosok) maibé ne’e la loos. Aspetu hotu-hotu ne’ebé iha uma kain ida nia laran responsabilidade hamutuk.

Estigma sosial ida-ne’e sei nafatin buras iha sosiedade tanba iha ligasaun ho kultura ne’ebé ninia abut metin iha artigu ida-ne’e hakerek na’in hakarak deskreve kona-ba papél aman sira-nian iha sosiedade Timor-Leste.

C. PASU IMPORTANTE NE’EBÉ PRESIZA AMAN SIRA HATENE LIU-LIU KUIDA FEEN MAK HANESAN;

  1. Aman mak ativu no responsavel jerál, no másimu ba uma kain iha aspetu isin no klamar nian ba parseiru (feen).
  2. Hatene kuida feen, durante periodu isin rua.
  3. Fó hanoin no suporta feen hakbesik ba fasilidade saúde rutinamente.
  4. Hatene fó primeiru sokorru bainhira akontese risku ruma ba inan ho kosok liu-liu iha periodu ko’us mak hanesan;
  • Halo intervensaun dahuluk bainhira feen oin halai ruma durante períodu ko’us
  • Halo intervensaun ba feen bainhira muta makas iha períodu ko’us
  • Halo intervensaun bainhira feen raan sai makas.
  • Halo intervensaun bainhira feen susar han hahán durante periodu ko’us (morning sickness)
  • Fó Hahán suplementu di’ak ba feen durante periodu ko’us
  • Fó Hahán suplementu ne’ebé di’ak ba feen hodi apoiu kreximentu ba bebé iha kanotak.

D. PASU IMPORTANTE NU’UDAR AMAN PRESIZA HATENE BA KUIDA BEBE HAFOIN MORIS MAK HANESAN TUIR MAI;

  1. Fó hariis bebé ho ko’us bainhira inan moras ou la konsege halo ninia knaar
  2. Koñese hahán di’ak no saudavel ba bebé liu-liu ba ninia kreximentu
  3. Koñese susu-been di’ak ba bebé durante ki’ik
  4. Hatene hadook labarik hosi risku sira hanesan eletrisidade ou fugaun ka buat selu-seluk tan ne’ebé la serve ba bebé hodi halimar.
  5. Akompaña dezenvolvimentu labarik nian bainhira sei ki’ik to’o boot
  6. Eduka no responsabiliza ba labarik to’o nia hetan ninia vida rasik.

Ko’alia kona-ba uma kain ita ko’alia kona-ba individu hirak-ne’ebé moris hamutuk iha fatin ida no iha ligasaun interdependénsia ba malu. No hosi uma kain mak harii xefe família, xefe aldeia, xefe suku to’o xefe estadu ka parte seluk povu mai hosi núkleu ki’ik uma kain. Uma kain atus ba atus rihun ba rihun hamutuk mak forma estadu ida.

Atu hakbiit uma-kain sira saida mak nu’udar estadu presta ba sira? Iha servisu multi-sektorál ne’ebé bainhira bele organiza ho di’ak ninia nakait bele fó rezultadu ida-ne’ebé di’ak.

Presiza tulun makas hosi parte relevante sira hanesan Ministériu Saúde, Justisa, ESTATAL no mós órgaun relijiozu sira-ne’ebé iha Timor-Leste.

E. MINISTÉRIU SAÚDE NIA PAPEL

Ministériu saúde nia papél ne’ebé presiza tulun inan, aman sira liu-liu hare hosi sikun autór nian mak; formasaun ba uma kain foun sira tamba iha lisaun sira balun hetan maibé balun la hetan durante iha karreira eskolár ou balun mós la eskola.

Edukasaun ba biolojia liu-liu kona-ba anatomia no area sensitivu sira (mane presiza hatene area sensitivu feto nian nune’e mós ba feto)

Fó koñesimentu kona-ba oinsá sexu durante períodu ko’us (sá fulan sá oras mak bele halo seksu)

Hanorin inan-aman sira, kona-ba pasu oinsá proteje inan ho kosok bainhira iha períodu ko’us.

Hanorin pasu oinsá ko’us bebé, fó han bebé, fó hariis bebé, no atendimentu ba bebé durante sei ki’ik. Oinsá garantia inan nia susubeen durante períodu fó susu, karik apoiu susu been extra oinsá ninia risku no parte negativu sira.

Iha fatin Nasaun balun bainhira inan ida atu ba partus iha fasilidade saúde aman presiza hetan sertifikadu formasaun kona-ba oinsá kuida inan ho kosok.

No ba inan sira ne’ebé laiha kaben ka laiha ema ne’ebé responsabiliza ba nia án presiza sasin ida liu-liu inan aman hosi inan ne’ebé atu partus ne’e atu nune’e la difikulta prosesu durante hetan asisténsia iha ospitál ka fasilidade saúde sira seluk.

F. PAPÉL MINISTÉRIU JUSTISA NIAN

Justisa mós parte ida-ne’ebé haree kona-ba oinsá tulun uma kain foun sira. Liuhosi edukasaun sívika atu sira bele hatene liután sira-nia direitu sidadania, no mós fasilita formasaun ho dokumentu sel-seluk tan ne’ebé relevante ho direitu sidadania nian. Parte ida atu kuda espíritu nasionalizmu iha kada sidadaun nia fuan.

  1. Fasilita formasaun báziku kona-ba diretu sidadania nian (saida mak bele halo ba estadu no saida mak estadu bele halo ba ninia sidadaun)
  2. Fó koñesimentu kona-ba símbolu Nasaun nian Hino Nasionál, signifikadu hosi bandeira no selu-seluk tan.
  3. Fasilita sertidaun RDTL sertidaun ba labarik sira ne’ebé foin moris

G. MINISTÉRIU ESTATAL

Liuhosi autoridade administrativa ho autoridade lokais sira mobiliza partisipasaun komunidade sira-nian liu-liu ba uma kain foun sira atu bele hetan formasaun bázika sira ne’ebé mensiona iha leten. Hala’o servisu integradu ida entre autoridade lokais ho knaar na’in saúde sira atu identifika uma kain foun sira hetan formasaun.

H. PAPÉL ÓRGAUN RELIJIOZU

Ikus liu mak parte órgaun relijiozu sira, ne’ebé partense ba vida klamar nian, akompaña ho akonsellamentu moral oinsá bele hetan armonia iha vida uma kain.

  1. Fasilita mós sertidaun batizmu ka sertidaun sira seluk, depende relijiaun ne’ebé sira fiar ba.
  2. Dudu ho korajen ba uma kain foun sira atu bele hetan lalais sira-nia matrimóniu

Hanoin hirak iha leten nee, autór hakerek ho pensamentu simples, atu realsa de’it katak formasaun ba inan aman foun sira la’ós edukasaun formal maibé apoiu inan aman foun sira.

Hosi hanoin sira iha leten bainhira inan-aman foun sira hetan ona formasaun báziku kada ema ida bele hetan koñesimentu di’ak liután iha uma kain/uma laran no espesialmente iha sosiedade.

Husu Ministériu Saúde, Justisa, ESTATAL ho Órgaun Relijiozu atu tuur hamutuk halo koordenasaun multi-sektorál hodi estabelese métodu formasaun ida-ne’e di’ak ba uma kain foun sira.

Modelu formasaun bele durante loron tolu, oras tolu, ka semana tolu depende ba módulu ne’ebé sei utiliza hodi fó formasaun.

Konkluzaun

Antes hakotu hakerek na’in hato’o Parabéns no Gloria ba povu maubere tomak. Inan-aman, maun-alin asuwa’in sira-nia dedikasaun no luta hosi frente hotu-hotu ba Timor-Leste nia ukun án. hakru’uk boot ba inan-aman sira iha Frente Armada, Klandestina ho Diplomata ba servisu badinas la sura kolen saláriu no selu-seluk tan hodi ohin ita hotu goza Liberdade.

Liuhosi artigu ida-ne’e hakerek na’in ezije ba parte kompetente sira ne’ebé mensionadu iha artigu laran atu tau iha konsiderasaun no espera bele servisu hamutuk ho liña koordenasaun di’ak no integradu ida hodi hakbiit ita-nia uma kain foun sira iha RDTL.

Bainhira pasu sira-ne’ebé deskreve iha artigu ida ne’e parte relevante sira bele tau iha konsiderasaun mak hamenus ona violénsia bazeia ba jéneru ka violénsia doméstika.

Hakbiit liután ema nia koñesimentu kona-ba vida moris iha sosiedade atravesa hosi uma kain foun sira.

Hakbiit ema nia koñesimentu ema nian kona-ba saúde no moris saudavel detalladamente kona-ba moris iha vida kazál nian.

Fasilita sidadaun valoriza moris nu’udar sidadaun ne’ebé onestu, tanba sira hetan ona edukasaun civika ne’ebé adekuadu.

Artigu simples ida ne’e hakerek na’in hakerek la reprezenta instituisaun ne’ebé hakerek na’in haknaar án ba. Maibé nu’udar opiniaun hanesan sidadaun simples iha Timor-Leste.

Dedika espesiál ba governante sira hotu iha ámbitu selebrasaun loron Konsulta Populár.

Carinton Salazar Gonzaga Freitas

Hakerek na’in livru MIPLIN & Desterradu Polítiku

Krítika no ideia bele dirije mai Email: carinton15@gmail.com
Kontaktu: +67077903355

Hakru’uk ho hakuak boot.

HAKEREK NO HATÁN

Please enter your comment!
Please enter your name here