Asesór prinsipál MTKI, Jacinto Rigoberto. Imajen/TATOLI.

DILI, 23 agostu 2019 (TATOLI)-Asesór Prinsipál Ministériu Turizmu, Komérsiu no Indústria (MTKI), Jacinto Rigoberto, hatete folin produtu lokál karun tanba produsaun rai-laran sei menus tebes.

Maski nune’e, Jacinto afirma katak Governu Daualuk esforsu hela atu tau prioridade ba setór agrikultura nune’e bele hasa’e produsaun rai-laran.

“Loos duni ami konsidera presu ba produtu lokál aas tanba ita-nia produsaun agora sei limitadu tebes mezmu orgánika, maibé karun tanba ne’e Governu tau hela prioridade atubele dudu setór agrikultura hodi bele kria produtu lokál ho kuantidade barak hodi presu ne’e kobre ba ema hotu no bele kompete ho presu sasán importasaun”, Jacinto Rigoberto dehan, ohin, iha Sentru Konvensaun Dili (CCD-sigla portugés) hafoin realiza konferénsia imprensa kona-ba feira gastronomia.

Eis governante ne’e afirma ba produtu ne’ebé de’it kuandu ninia kuantidade menus maka presu mós aas no kuantidade sa’e maka presu sei normaliza, tanba ne’e produsaun rai-laran presiza tau atensaun.

Iha serimónia teste diversifikasaun produtu na’an-manu (frangu) ho fahi ba prosesamentu ai-han xourisu ho kompozisaun ingrediente lokál sira iha Konventu Canossiana, Balidi, foin lalais, ne’ebé realiza husi Movimentu Asaun Ekonomia Komunitária (MAEKOM) ho Madre Canossiana sira, Primeiru-Ministru (PM), Taur Matan Ruak, hatete Governu sei esforsu hodi estabiliza presu ba produtu rai-laran.

“Problema boot iha ita-nia rai-laran realmente mak presu produtu sira nian. Governu tenta halo ezersísiu para estabiliza presu produtu sira nian, aumenta konsumu no produsaun tanba presu produtu lokál boot liu fali produtu importasaun. Naturalmente ema sira ne’ebé osan laiha sira halai hotu ba ida ne’ebé baratu tanba ita nian karun”, Taur hatete ida ne’e bainhira partisipa iha serimónia ne’e.

Xefe Ezekutivu ne’e afirma se timoroan hakarak kompete tenke hatún presu.

“Daudaun ne’e mós ami estuda hela atu proteje produsaun ba produtu lokál. Dalan di’ak ida maka timoroan sira komesa aprende atubele kompete iha presu tanba iha merkadu livre kompetisaun presu maka hamate malu”, haktuir eis Prezidente Repúblika ne’e.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here